Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

A do kthehet Shqipëria në bazë për strehimin e terroristëve të ISIS? Deklarata e rëndësishme në Tiranë që nuk mori vëmendje

Politiko 6 Qershor 2018, 14:55

A do kthehet Shqipëria në bazë për strehimin e

Në Shqipëri pritet të ngrihet një qendër koordinimi për terroristët e ISIS. Lajmi është konfirmuar nga kryeministri i Bullgarisë, Bojko Borisov, në konferencën që mbajti në Tiranë në krah të kryeministrit Edi Rama.

“Në Shqipëri do të bëhet një qendër koordinimi për luftëtarët që kthehen nga ISIS në territorin e Ballkanit”, deklaroi kryeministri i Bullgarisë. Vetë kryeministri Rama dhe zyrtarë të tjerë të Qeverisë nuk kanë dhënë detaje për këtë qendër dhe cili do të jetë funksioni i saj.

I vetmi që ka ngritur shqetësimin deri më tani është Petrit Vasili, kreu i Grupit Parlamentar të Lëvizjes Socialiste për Integrim.

Vasili theksoi se ky vendim duhet të merret nga Parlamenti i Shqipërisë dhe jo nga kryeministri, pasi kjo është një nismë delikate me shumë të panjohura. Sipas tij, shtete shumë herë më të fuqishme ekonomikisht dhe me nivel të lartë sigurie iu shmangen këtyre vendimeve, ndërkohë që qeveria shqiptare i pranon pa asnjë konsultim me publikun.

Ndonëse deklarata ka disa ditë që është bërë, mediat shqiptare kanë filluar të merren sot me këtë çështje.

Pyetja që kërkon përgjigje është nese vendi ynë do të kthehet në një bazë për strehimin e atyre luftëtarëve ballkanas që kanë vrarë dhe kanë kryer krime të tjera në Siri dhe Irak, në emër të famëkeqëve të ISIS.

Shqipëria nuk është shteti ballkanik që ka numrin më të lartë të pjesëmarrësve në luftën e Sirisë. Bosnje-Hercegovina, Kosova dhe Maqedonia renditen përpara vendit tonë.

Gjithsesi, nuk do ishte hera e parë që Shqipëria do të pranonte të kthehej në bazë strehimi për grupe që klasifikohen terroriste nga shtete të caktuara.

Në vitin 2006-të, Qeveria e drejtuar nga Sali Berisha pranoi të strehonte 6 ujgurë që dolën nga burgu i Guantanamos dhe Kina i konsideronte terroristë. Ky vendim tensionoi marrëdhëniet e Tiranës me Peknin.

Disa vite më vonë, ishte sërish Berisha që pranoi të strehonte disa muxhahedinë të MEK, e cila klasifikohet organizatë terroriste në Iran. Qeveria pasuese, e drejtuar nga Edi Rama, e rriti edhe më tej numrin e muxhahedinëve në vendin tonë, duke arritur në 3 mijë. Ky vendim nuk u mirëprit nga Republika Islamike e Iranit.

Në vitin 2016-të, në Turqi u tentua të organizohej një grusht shteti ndaj presidentit Rexhep Taip Erdogan. Pasi arriti të ruajë pushtetin e fituar me votë, Erdogan akuzoi Lëvizjen Gylen si organizatore e puçit. Kjo lëvizje është shpallur organizatë terroriste nga partneri ynë strategjik, ndërkohë që Tirana nuk i është përgjigjur thirrjeve të Ankarasë për të ekstraduar personat e dyshuar si të përfshirë në atë ngjarje.

Shqipëria nuk ka qenë imune ndaj rreziqeve për sulme terroriste. Një vit më parë u parandalua një sulm terrorist në stadiumin ‘Loro Boriçi’ në Shkodër, ku do të luanin kombëtaret e Shqipërisë dhe Izraelit. Atentatorët ishin të lidhur me ISIS.

Në muajin mars të këtij viti, disa shtetas iranianë u arrestuan për shkak se dyshoheshin se do kryenin sulm terrorist pranë Kryegjyshatës së Bektashinjve në Tiranë. Policia nuk dha detaje nëse iranianët ishin ose jo pjesë e grupit muxhahedin.