Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Adriatik Llalla: Donald Lu më kërkoi arrestimin e Ilir Metës. Ambasadori nuk interesohej për destabilitetin e Shqipërisë

Politiko 11 Prill 2018, 17:19

Është zbardhur letra që ish-Prokurori i Përgjithshëm i Shqipërisë, Adriatik Llalla i ka dërguar Nënkomisionit të Jashtëm të SHBA për Europën dhe Eurasinë, ku flet për reformën në drejtësi dhe qëndrimet e ambasadorit amerikan në Tiranë, Donald Lu.

Në këtë letër që i është dorëzuar kryetarit të nënkomisionit, Dana Rohrabacher, në maj të 2017-ës, si ankes i dëgjesës për Ballkanin Perëndimor, Llalla thotë se ambasadori Lu i ka kërkuar arrestimin e presidentit Ilir Meta, gjatë kohës që ai drejtonte Kuvendin e Shqipërisë dhe Lëvizjen Socialiste për Integrim. Sipas pretendimeve të Lu-së, Meta ishte politikan i korruptuar dhe arrestimi i tij mund të ndihmonte procesin integrues të vendit.

Llalla shkruan se Lu nuk ishte i interesuar nëse arrestimi pa prova i Metës mund të krijonte një situatë të rrezikshme në Shqipëri dhe për këtë arsye kishte ndërprerë takimin.

“... në maj të 2015, ambasadori Lu kërkoi një takim me Prokurorin e Përgjithshëm. Në këtë takim, ambasadori Lu i kërkoi Prokurorit të Përgjithshëm të ndërhynte për ndikuar që prokurorët të mos kundërshtonin projektin e tij të reformës në drejtësi. Gjithashtu, në një mënyrë jo-diplomatike dhe kundër çdo norme të parashikuar në Konventën e Vjenës, ambasadori Lu i sugjeroi Prokurorit të Përgjithshëm se duhet të arrestonte kreun e Kuvendit dhe njëkohësisht kryetar i Lëvizjes Socialiste për Integrim, Ilir Metën. Në vlerësimin e zotit Lu, kreu i Kuvendit Meta ishte i korruptuar dhe po pengonte reformën në drejtësi. Arrestimi i tij i mundshëm do të ndihmonte Shqipërinë të integrohej sa më shpejt në Bashkimin Europian. Kjo kërkesë, totalisht e papërgjegjshme, detyroi Prokurorin e Përgjithshëm të ndërpriste takimin, duke shpjeguar se arrestimi i çdo personi, përfshirë zyrtarët, realizohet bazuar vetëm në prova.

Prokurori i Përgjithshëm u shpreh se kërkesa e tij (Donald Lu-së) ishte e palogjikshme dhe e pajustifikuar, dhe në mungesë të plotë të provave për të akuzuar zyrtarët e lartë për korrupsion, mund të shkaktonte paqëndrueshmëri politike dhe sociale në Shqipëri. Në pozicionet pasuese të diplomatit Lu, ekziston përshtypja se rreziku i mundshëm i paqëndrueshmërisë nuk ishte prioritet për të. Në muajt pasues, diskutimi për reformën në drejtësi krijoi një polarizim të fortë politik”, shprehet Adriatik Llalla në këtë letër.

Gjatë kohës që drejtonte Prokurorinë e Përgjithshme, Llalla tha se Lu kishte kërkuar arrestimin e një politikani të rëndësishëm, por pa përmendur emra. Në atë periudhë u aludua nga disa analistë dhe media se bëhej fjalë për ish-kryeministrin Sali Berisha.