Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Afrojnë zgjedhjet/ 1 vit pas vendimit, ‘Shqiptarja’, ‘Dita’ dhe ‘TiranaPost’ zbulojnë “detaje të reja” për Ardit Gjoklajn. Lehtësojnë Erion Veliajn

Politiko 9 Shkurt 2019, 12:16

Në prill të 2018-ës, Gjykata e Tiranës rrëzoi akuzat e Prokurorisë ndaj dy punonjësve në landfillin e Sharrës, të cilët akuzoheshin se kishin shkelur rregullat në punë dhe për pasojë kishin shkaktuar vdekjen e Ardit Gjoklajt, 17 vjeç, më 7 gusht të 2016-ës.

Por gati një vit pas këtij vendimi, tre media kanë publikuar në të njëjtën kohë disa “detaje të reja” që, sipas tyre, ngrejnë dyshime se 17 vjeçari u vra jashtë landfillit. 'Shqiptarja.com', gazeta 'Dita' dhe 'TiranaPost' kanë publikuar ‘copy paste’ një shkrim që nuk ka autor, me titull se “Ardit Gjoklaj mund të jetë vrarë jashtë landfillit të Sharrës”.

Nxjerrja e vdekjes jashtë landfillit lehtëson në mënyrë direkte kryebashkiakun e Tiranës, Erion Veliaj, i cili kërkon një mandat të dytë në zgjedhjet lokale të qershorit.

Landfilli i Sharrës është nën administrimin e Bashkisë së Tiranës, ndërkohë që në shkurt 2016-ës, kompania “3R” instaloi aty një impiant për seleksionimin dhe menaxhimin e mbetjeve. Kryebashkiaku Veliaj shkoi në landfill për të promovuar impiantin dhe bëri thirrje që njerëzit të punësoheshin në kompani pasi do respektoheshin të gjitha kushtet e sigurisë, si dhe kontratat.

Ardit Gjoklaj, i mitur, u punësua në landfill pa një kontratë pune dhe punonte jashtë çdo rregulli të sigurisë.

Akuzat politike e kanë shoqëruar kryebashkiakun Veliaj përgjatë këtyre tre viteve, por ai ka refuzuar të mbajë përgjegjësi. Përplasja e fundit ishte me studentë të ‘Lëvizjes së Universitetit’, të cilët e paralajmëruan se historia e Ardit Gjoklajt nuk do i shkëputet kurrë nga karriera politike.

Për t’u rikthyer te shkrimi i tre mediave, aty thuhet se “vendimi i arsyetuar i gjykatës, i cili mbështetur mbi fakte e prova, por edhe nga ekspertiza e mjekëve ligjorë, vërteton faktin se Ardit Gjoklaj mund të jetë vrarë jashtë landfillit të Sharrës.”

Edhe pse flasin për “vërtetim fakti”, këto media nuk konfirmojnë dot se Gjoklaj është vrarë jashtë landfillit, por theksojnë se edhe “mund” të jetë vrarë jashtë landfillit.

Në artikull, ku pasqyrohet pjesërisht vendimi i Gjykatës, është shmangur qëndrimi i trupit gjykues që akuzonte Prokurorinë për hetime selektive dhe jo të plota për këtë ngjarje.

“Faktet duhet të kishin shkundur policinë dhe prokurorinë për të kryer hetime të thella dhe të specializuara me të gjitha metodat dhe format e lejuara ligjore,” shprehet trupa gjykuese.

Për vrasjen e Ardit Gjoklajt nuk u shpall askush fajtor.