Flash News

Posta e mëngjesit/ Me 2 rreshta: Çfarë pati rëndësi dje në Shqipëri

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

KRYESORE

Aleanca për Mbrojtjen e Teatrit i përgjigjet Ramës: Fondacion që do marrë përsipër restaurimin e godinës duke përfshirë dhe donacione private

Politiko 14 Shtator 2018, 19:31
Aleanca për Mbrojtjen e Teatrit i përgjigjet Ramës: Fondacion

Aleanca për Mbrojtjen e Teatrit Kombëtar ri është përgjigjur deklaratave të bëra nga kryeministri Edi Rama mbrëmjen e djeshme sa i takon çështjes së teatrit.

Në një deklaratë të shpërndarë për mediat, Aleanca thotë se intervista e djeshme e kryeministrit vërtetoi se qeveria nuk ka ndërmend të tërhiqet nga plani për të grabitur truallin publik duke shembur Teatrin Kombëtar dhe se intervista ishte e mbushur me pretendime të pavërteta.

Aleanca thotë se letra e Komisionit Evropian nuk thotë asgjë në lidhje me ndërtimin ose jo të Teatrit pasi nuk ishin pyetur për këtë problem teksa thekson se kryeministri vazhdon të mos shprehet për problemet e tjera kushtetuese të ligjit, të përshkruara edhe në Dekretin e Presidentit.

“Aleanca për Mbrojtjen e Teatrit informon publikun se do të vazhdojë të mbrojë truallin publik dhe godinën deri në restaurimin final të saj duke përdorur të gjitha mjetet. Sidoqoftë skema e ardhshme që Qeveria do të përdorë për të shembur godinën, ne do të jemi aty për ta kundërshtuar”, thekson Aleanca teksa bën të ditur se po punon mbi një propozim konkret për ngritjen e një fondacioni që do marrë përsipër të bëjë restaurimin e plotë të godinës duke përfshirë dhe donacione private.

Deklarata e plotë

Tiranë 14.09.2018

DEKLARATË PËR MEDIAT

Intervista e djeshme e Kryeministrit Edi Rama vërtetoi se qeveria nuk ka ndërmend të tërhiqet nga plani për të grabitur truallin publik duke shembur Teatrin Kombëtar. Intervista ishte e mbushur me pretendime të pavërteta por po ashtu vërtetoi disa nga dyshimet e shprehura nga Aleanca, të cilat përbëjnë prova të mjaftueshme për të filluar një proces penal. Më konkretisht:

  1. Letra e Komisionit Evropian nuk thotë asgjë në lidhje me ndërtimin ose jo të Teatrit pasi nuk ishin pyetur për këtë problem, e nuk kishin marrë përsipër ti përgjigjeshin atij. Komisioni Evropian ishte pyetur mbi ligjshmërinë e procesit, të cilin e rrëzoi poshtë për shkak të mungesës së konkurrencës.

  2. Kryeministri vazhdon të mos shprehet për problemet e tjera kushtetuese të ligjit, të përshkruara edhe në Dekretin e Presidentit. Për këto, Komision Evropian nuk është shprehur ende, dukë i lënë kohë qeverisë të reflektojë.

  3. Kryeministri konfirmoi se porositësi i projektit është ai vetë, dhe jo kompania Fusha sh.p.k. Statusi me të cilin ai e ka bërë këtë hap është i paqartë, në mos i jashtëligjshëm. Kryeministri konfirmoi se përcakton ai lejet e ndërtimit në Tiranë, e jo një plan urbanistik i njohur e i barabartë për të tërë.

  4. Kryeministri konfirmoi se në projekt përfshihen prona të tjera private për të cilat qeveria nuk pranonte të jepte informacione më parë. Është ende e paqartë publikisht, por me shumë gjasa shkelje e ligjit, se si Fusha sh.p.k planifikon të ndërtojë në këto prona të cilat nuk i ka ende në pronësi.

Aleanca për Mbrojtjen e Teatrit informon publikun se do të vazhdojë të mbrojë truallin publik dhe godinën deri në restaurimin final të saj duke përdorur të gjitha mjetet. Sidoqoftë skema e ardhshme që Qeveria do të përdorë për të shembur godinën, ne do të jemi aty për ta kundërshtuar.

Aleanca do të vazhdojë kontaktet me komunitetin ndërkombëtar duke kërkuar prej tyre të shprehen në lidhje me problemet kushtetuese të ligjit, në një moment kritik për vendin kur nuk ka gjykata të brendshme që mund ta bëjnë këtë.

Së fundmi, Aleanca po fillon të punojë mbi një propozim konkret për ngritjen e një fondacioni që do marrë përsipër të bëjë restaurimin e plotë të godinës duke përfshirë dhe donacione private. Në këtë mënyrë alibia e fondeve të munguara do marrë fund njëherë e mirë.

ALEANCA PËR MBROJTJEN E TEATRIT

 

Të fundit