Flash News

Posta e mëngjesit/ Me 2 rreshta: Çfarë pati rëndësi dje në Shqipëri

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

KRYESORE

Ambasadori rus flet hapur: Synojmë forcimin e ndikimit në Ballkan. Shqipëria të ndjekë një politikë shumëdimensionale

Politiko 16 Shkurt 2018, 10:49
Ambasadori rus flet hapur: Synojmë forcimin e ndikimit në Ballkan.

Ambasadori i Rusisë në Tiranë, Aleksandër Karpushin ka folur për qëllimet e shtetit të tij ndaj rajonit të Ballkanit dhe Shqipërisë. Në tryezën e organizuar nga ‘Instituti i Studimeve Ndërkombëtare’, me temë  “Politika e jashtme e Rusisë: Shqipëria dhe çështje strategjike”, Karpushin foli për marrëdhënie historike dhe vëllazërore midis Rusisë dhe Shqipërisë, ndonëse pengesat janë të mëdha.

Diplomati rus theksoi se Moska dëshiron të nxisë përfundimin e tejzgjatur të ndërprerjeve të marrëdhënieve midis të dy vendeve.

“Lidhjet tona dypalëshe janë dëmtuar seriozisht nga shkëputja gati 30-vjeçare në marrëdhëniet diplomatike. Ndërsa në 28 vite të fundit marrëdhëniet tona, nëse i shikojmë në tërësi, kanë qenë mjaft normale dhe miqësore. Nuk kemi asnjë problem të pazgjidhur bilateral, të mos flasim për konflikte. Megjithatë, dialogu ynë është karakterizuar nga politizimi i tepërt i lidhjeve bilaterale dhe shpërfillja e potencialit tonë të përbashkët. Si rrjedhojë, bashkëpunimi ekonomiko-tregtar midis dy vendeve mbetet në një nivel shumë të ulët. Po edhe në fushën politike nuk është gjithçka në rregull. Ka ngecur nënshkrimi i dokumenteve të dakordësuara dypalëshe. Nuk janë shfrytëzuar plotësisht kanalet e komunikimit ndërparlamentar dhe konsultimeve ndërinstitucionale. Po ashtu, vazhdojnë edhe disa mosmarrëveshje në adresimin e çështjeve të caktuara ndërkombëtare, si, për shembull, çështja e sanksioneve antiruse. Dhe e gjitha kjo natyrisht që nuk është në funksion të dialogut dypalësh. Do të doja të theksoja që Rusia është e gatshme ta nxisë përfundimin e kësaj ndërprerjeje të tejzgjatur të kontakteve tona.  Shpresoj shumë që këtë vit do t’ia dalim më në fund të organizojmë sesionin e radhës të Komisionit Ndërqeveritar për Tregtinë, Bashkëpunimin Ekonomik dhe Tekniko-Shkencor, i cili nuk është mbledhur prej tetë vitesh. Me palën shqiptare kemi arritur një dakordësi paraprake për të mbajtur në kuadër të këtij Komisioni edhe një forum të përbashkët biznesi”, është shprehur Karpushin.

Më pas, ambasadori Karpushin u fokusua te roli i Rusisë në Ballkan dhe strategjinë e saj ndaj rajonit. Ai pranoi se Moska kërkon të rrisë influencën e saj në rajon, por jo duke patur parasysh konotacionin negativ që i vishet nga Perëndimi. Sipas tij, Moska nuk është shprehur asnjë kundër anëtarësimit të vendeve të Ballkanit në Bashkimin Europian.

Ai kërkoi që ky rajon të mos përdoret më për lojëra gjeopolitike, ndërsa nga Shqipëria kërkoi një politikë shumëdimensionale.

“Të nderuar kolegë, këtu në Shqipëri më pyesin shpeshherë: a e do me të vërtetë Rusia forcimin e ndikimit të saj në Ballkan? Dhe a është ajo kundër integrimit të rajonit në BE? Unë do t’ju përgjigjem me fjalët e ministrit Lavrov, i cili u shpreh se Ballkani është “një rajon, të cilin Perëndimi për arsye të panjohura e konsideron si një fushë veprimesh provokuese të Rusisë… Dhe këtu Perëndimi prapë po i trajton këto çështje me një logjikë të papërshtatshme, të cilën e përdor dhe në trajtimin e hapësirës postsovjetike: “ose me ne, ose kundër nesh””. Dhe kjo është e vërtetë! Çdo përpjekje e Rusisë për të ndërtuar marrëdhënie normale me vendet ballkanike bëhet menjëherë objekt i një shqetësimi të politikanëve perëndimorë, të cilët dalin pastaj me deklarata të tipit: “Rusia kërkon rritjen e influencës së saj në Ballkan”. Ne jemi shumë të vetëdijshëm për një rëndësi të veçantë gjeopolitike si të Shqipërisë, ashtu edhe të gjithë Ballkanit Perëndimor. Dhe natyrisht që ne synojmë forcimin e ndikimit tonë në këtë pjesë të Evropës. Por këtu duhet të specifikojmë se çfarë pikërisht nënkuptojmë me fjalën “ndikim”. Partnerët tanë perëndimorë s’e di pse shohin te kjo fjalë njëfarë konotacioni negativ dhe pastaj e frikësojnë veten dhe njëri-tjetrin me “planet agresive” të Rusisë në Ballkan, me “orekset ekspansioniste” të Moskës, me “propagandën armiqësore të Kremlinit” dhe kështu me radhë. Por të gjitha këto akuza nuk kanë lidhje me Rusinë, veçanërisht me Rusinë postsovjetike ose me Rusinë e re, e cila i ka ndryshuar rrënjësisht edhe prioritetet e saj të brendshme, edhe linjat e politikës së saj të jashtme. Rusia kurrë nuk ka dalë kundër perspektivës evropiane qoftë të Shqipërisë, qoftë të vendeve të tjera të rajonit. I vetmi interes i Rusisë është që Ballkani Perëndimor të zhvillohet në mënyrë të qëndrueshme dhe të kapërcejë të gjitha kontradiktat e brendshme që ende ekzistojnë në rajon. Siç theksoi Ministri Lavrov, ka ardhur koha që Ballkani të mos përdoret më në lojërat gjeopolitike. Dhe pa dyshim ne do të ishim të lumtur nëse Shqipëria do të ndiqte pikërisht një politikë të tillë, pra një politikë shumëdimensionale”, ka deklaruar ndër të tjera ambasadori i Rusisë.

Tensioni me Turqinë, Nikos Kotzias: Janë të irrituar sepse po zgjidhim problemet me Shqipërinë. Greqia nuk e ka humbur influencën

Të fundit