Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Arrestimi në Durrës, a po i humbet durimi Erdoganit me Edi Ramën? Ministri serb: Tashmë Turqia është me ne

Politiko 13 Tetor 2017, 15:40

Arrestimi në Durrës, a po i humbet durimi Erdoganit me Edi Ramën?

Muhammed Yasir Aydogmus, 39 vjeç, u arrestua në portin e Durrësit kur presidenti i Turqisë, Rexhep Taip Erdogan, ishte bërë gati të nisej për një vizitë dy ditore në Beograd, i shoqëruar nga 100 biznesmenë të fuqishëm.

Sipas medieve truke, Yasir Aydogmus është anëtar i Lëvizjes së Gylen dhe ishte shpallur në kërkim nga Ankaraja. Kjo ishte arsyeja përse ai u arrestua në Durrës gjatë përpjekjes për të udhëtuar drejt Italisë me pasaportë false. Tashmë 39 vjeçari pritet të ekstradohet drejt Turqisë, duke u bërë i pari anëtar i Lëvizjes Gylen që ekstradohet nga autoritetet shqiptare.

Shqipëria dhe Kosova kanë qenë dy prej shteteve të pakta në Ballkan dhe Lindjen e Mesme që kanë hezituar t’i përgjigjen kërkesës së Erdogan për të ekstraduar të gjithë anëtarët e Lëvizjes së Fethullah Gylen, të cilin presidenti turk e akuzon për tentativën për grusht shteti më 15 korrik të 2016-ës.

Por nëse i referohemi intervistës që ministri i Tregtisë së Serbisë, Rasim Lajic ka dhënë për ‘Radio Vojvodinën’ pas vizitës së Erdogan, këtij të fundit mesa duket po i humbet durimi me kryeministrin e Shqipërisë, Edi Rama dhe me drejtuesit në Prishtinë.

Sipas Lajic, marrëdhëniet e Turqisë me Tiranën dhe Prishtinën nuk janë ato të disa viteve më parë dhe kjo situatë ka ndryshuar në mënyrë dramatike pas përpjekjeve për grusht shteti. Ministri serb thekson gatishmërinë e presidentit Aleksandar Vuçiç për t’i dhënë mbështetje të menjëhershme Erdoganit kur në Turqi ende po zhvillohej tentativa për grusht-shteti, ndërsa është shprehur i hapur për të ekstraduar të akuzuarit e Ankarasë.

“Marrëdhëniet e Turqisë me Kosovën dhe Shqipërinë nuk janë ajo që ishin disa vjet më parë. Kjo situatë ndryshoi në mënyrë dramatike nga përpjekja e grusht-shtetit. Nga ana tjetër, në Shqipëri dhe në Kosovë ka një strukturë të ndjekësve Fetulah Gylen, të cilët janë në pozita të rëndësishme… Disa nga ndjekësit janë në pozita të rëndësishme në Kosovë dhe Shqipëri. Unë nuk e di se sa e saktë është kjo, unë thjesht transmetoj atë që dëgjoj, atë që turqit po e transmetojnë. Dhe, edhe pas shumë kërkesave të dërguara në Tiranë dhe Prishtinë për këta ndjekës të Gylenit, asgjë nuk është ndërmarrë. Ka një ftohje në këto marrëdhënie”, ka deklaruar Lajic.

Ndërkohë, në Tiranë kanë mbërritur disa zyrtarë të rëndësishëm turq, i fundit ishte kryeprokurori i vendit, i cili kërkoi goditjen e grupeve të Gylen, ndërsa media shtetërore turke, Anadolu Agency, ka publikuar disa herë shkrime kundër drejtuesve të Komunitetit Mysliman të Shqipërisë, për të cilët thotë se janë të lidhur me Gylen.