Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Artan Fuga është mosbesues: Çfarë qeverie është kjo? Premton një përgjigje nesër

Politiko 19 Maj 2017, 10:02

Artan Fuga është mosbesues: Çfarë qeverie është

'A do të hyjë opozita në zgjedhje?' e ka titulluar Artan Fuga një shënim të mëngjesit të së premtes. Pyetje për të cilën premton një analizë/përgjigje një ditë më pas, pra të shtunën në ora 14.

Megjithatë, nuk duron deri nesër dhe e bën që sot një 'prolog' ku shihet qartë se ka mbetur deri diku pa 'tekst' nga Marrëveshja. (Se mos është i vetmi!) Fuga, me sa duket, është një prej atyre intelektualëve dhe gazetarëve, të angazhuar në krah të Bashës, në një luftë 'për jetë a vdekje' apo për "Republikën e Re", që ndihen sot të 'tradhtuar' prej liderit të opozitës.

Postimi i plotë i Fugës:

(Prolog: Më vjen ndërmend te "Lufta dhe Paqja" e Tolstoit ku mjeshtërisht në volumin e tretë të romanit sagë, kryevepër botërore, paraqiten luftrat e Bonapartit në Rusi. Pasi mbaronin betejat, midis rusëve dhe francezëve, gjeneralët rusë i raportonin Carit se e kishin fituar ata betejën, kurse gjeneralët francezë i raportonin Napoleonit se përkundrazi e kishin fituar ata atë betejë. Beteja që edhe sot festohen nga të dy palët si festa të mëdha ushtarake dhe arritje monumentale të strategjive ushtarake të dy palëve)

Pas marrëveshjes midis kryeministrit dhe kryetarit të partisë demokratike, një sërë pyetjesh kërkojnë përgjigje nga ne si qytetarë. Përtej mllefeve dhe interesave partiake që e bëjnë të zezën të bardhë dhe të bardhën të zezë.

Cfarë qeverie është kjo që do të krijohet me pjesë marrjen jo pak por të disa ministrave dhe zëvendës kryeministrit propozuar a caktuar nga opozita dhe të disa drejtorëve të rëndësishëm? Qeveri teknike, bashkëqeverisje, qeveri besimi, qeveri me dy programe të ndryshme administrimi dhe sa do të vazhdojë?

Eshtë një pakt bashkëjetese,

pak bashkim - vëllazërimi,

qeveri pajtimi kombëtar,

një modus vivendi i përkohshëm,

një rivalitet dhe tension forcash brenda qeverisë?

Askush nuk na sqaron. Të gjitha palët bërtasin fitoreeeee, sukseseeeee, arritjeeeeeee.

Edhe te Cadra edhe te Piramida.

Duke luftuar bashkë me kolegë dhe qytetarë të tjerë për zgjedhje të lira e refuzuar zgjedhjet që përjashtonin opozitën, a nuk lind pyetja : Cfarë do të thotë zgjedhje pa opozitën?

Sepse ka dy mënyra për monizëm dhe që varrosin pluralizimin : e para që opozita të përjashtohet nga zgjedhjet. E dyta që opozita të hyjë edhe ajo në qeveri brenda një programi të përbashkët me qeverinë ekzistuese.

Mos kemi ngelur përsëri pa opozitë përgjatë fushatës elektorale?

Mos jemi në kushtet e një koalicioni të mundshëm me bazë të gjerë si i modelit Merkel, pra kemi një model "Rama", pra "Merkel" shqiptar, ku opozita dhe ministrat e propozuar prej saj vihen nën kontrollin e kryeministrit dhe opozita kthehet në një "porta voce" e anoncimit publik te porta e Kryesisë të Kuvendit të marrëveshjes të kryer kokë më kokë ?

Mos e afruan zëmërgjerësisht formulën "Big Mac" sic mund të ofrohet një kusi me supë ku janë hedhur copa mishi, kothere buke, zarzavate të ndryshme, plot shije, por vetëm me një lugë naftë brenda? Mos data e zgjedhjeve në 25 qershor, e bën të pamundur dhe të kotë hyrjen e antarëve të qeverisë me propozimin e opozitës në qeverinë e besimit? E besimit midis kujt dhe kujt?

Cfarë mund të bëjnë ministrat opozitarë për një javë në qeverisje?

Në fund të fundit, a nuk jemi në një gjendje paradoksale kur partia socialiste qeverisi me koalicion me LSI për katër vjet duke pasur në opozitë partinë demokratike dhe tani qeveris një javë në koalicion me partinë demokratike dhe ku LSI është opozita de facto?