Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Bindja e fundit. "Dëshmitarët mediatikë dhe zyra" ku u 'pendua' kandidati i Patozit për Lezhën/ FOTO  

Politiko 22 Maj 2019, 18:49

Politiko.al

Salvador Kaçaj, kandidati i Bindjes Demokratike për Bashkinë e Lezhës, i paraqitur zyrtarisht nga partia e Astrit Patozit edhe në listat e KQZ, është tërhequr para dy ditësh nga konkurimi. Në një status në Facebook Kaçaj ka shpjeguar edhe arsyet e tërheqjes nga gara duke thënë se, nuk mund të shërbente si fasadë e përpjekjes për të kthyer në Shqipëri një regjim partiak të lidhur me krimin.

Pas tërheqjes nuk ka munguar reagimi i kryetarit të 'Bindjes' Astrit Patozi i cili ka shkruar, po në Facebook se, nuk ia vlen të merremi me të penduarit dhe se, 'ua dimë zyrat ku i kanë thirrur në prani të dëshmitarëve mediatikë'.

Patozi, me sa duket i ka patur të sakta informacionet për 'zyrat dhe dëshmitarët mediatikë'. Politiko.al ka siguruar një foto të marrë në zyrën e ish-kryeministrit Sali Berisha ku shfaqen Berisha, Salvador Kaçaj, Agron Gjekmarkaj dhe kryetari i PD së Laçit, Behar Haxhiu. Burimet e Politiko bëjnë me dije se fotoja është marrë pas një konsulte të kandidatit të 'Bindjes' me ish-kryeministrin, në prani të dy miqve të tij, analistit Agron Gjekmarkaj dhe Haxhiut.

Politiko nuk është në dijeni të bisedës së bërë në takim dhe as të faktit se kush e ka kërkuar takimin, por ka mësuar se pikërisht aty Kaçaj e ka 'vulosur' vendimin për t'u tërhequr nga gara, duke i hequr mazhorancës së Ramës një mundësi për të marrë Bashkinë e Lezhës dhe për ta legjitimuar fitoren duke përdorur një kandidat të së djathtës, Kaçajn.

Salvador Kaçaj ka qenë kryear i Bashkisë së Shëngjinit për të djathtën dhe ka lidhje të vjetra dhe të forta me PD, jo vetëm politike por edhe familjare. Ai është nipi i Lukë Kaçajt, tenorit të famshëm dhe kushëri i Dodë Kaçajt të ndjerë, ish-deputet i Partisë Demokratike për Malësinë e Madhe.

Kaçaj rrjedh nga një familje e persekutuar gjatë komunizmit. Ai ka qenë futbollist i Kombëtares shqiptare të futbollit dhe ka luajtur për Besëlidhjen, Skënderbeun dhe Vllazninë. Ai gëzon popullaritet në Greqi pasi ka luajtur për disa skuadra greke si Athinaikos etj.

 

Të fundit