A ia vlen t'i investoj kursimet e mia ne bono thesari, siç na sugjeron njoftimi sapo hapim e-Albania. Sa mund të jetë interesi për vlere mbi 2 milionë lekë të reja?

Përgjigje:

I nderuar lexues. Në radhë të parë  duhet thënë gjithnjë që sasia e parave të destinuara për kursim ose investim është vetëm teprica e të ardhurave që mbetet pasi kemi zbritur shpenzimet. Kështu nuk cënoni konsumin tuaj të përditshëm. Investimet mund të bëhen në instrumente të ndryshme financiare (bono thesari, obligacione, aksione, etj.) ose në projekte të ndryshme biznesi (biznese të reja start-up, ose biznese ekzistuese).

Secila prej këtyre alternativave të investimit ka rrezikun e vet të dështimit, ndaj edhe ne, para se të vendosim të investojmë, përpiqemi të llogarisim këtë rrezik me përafërsi e më pas në varësi të qasjes (frikës) sonë ndaj këtij rreziku, marrim vendimin nëse ia vlen të hyjmë në këtë transaksion apo jo. Sa më i madh rreziku ku angazhojmë kursimet tona, aq më e madhe edhe norma  kthimit (fitimi) që ne presim nga një investim i tillë.

Bonot e Thesarit janë letra me vlerë (tituj) të borxhit të Qeverisë. Shiten (emetohen) nga Qeveria tek qytetarët në këmbim të parave që këta të fundit i japin hua Qeverisë për një afat të shkurtër (3, 6 dhe 12 muaj). Termi “Thesari” tregon se janë tituj që shiten (emetohen)  dhe garantohen nga Qeveria.

Bonot e thesarit janë instrumentet financiarë me rrezikun më të vogël në qarkullim, dhe ndaj konsiderohen si shumë të sigurta. Kanë rrezik të vogël sepse Qeveria nuk dështon pothuajse asnjëherë në pagimin e borxhit mbrapsht tek qytetarët së bashku me interesat përkatëse. Qeveria nuk dështon sepse ka gjithmonë para për të paguar detyrimet (aftësi pagese).

Kjo sepse Qeveria ka në dorë tagrin fiskal, që dmth mund të rrisë taksat që të gjenerojë të ardhura me qëllim pagimin e detyrimeve. Mund t’i kërkojë bankës qendrore që të emetojë para për të paguar detyrimet shtetërore (kjo bëhet në kushte shumë të veçanta dhe në mënyrë të limituar). Si dhe Qeveria mund të marrë hua tek shtete të tjera ose tek institucione financiare ndërkombëtare (si FMN, Banka Botërore etj.) për të paguar detyrimet.

Ndaj bonot e thesarit konsiderohen me pothuajse zero risk. I vetmi rrezik që ka ky investim është zhvlerësimi i monedhës me të cilin keni blerë bonon e thesarit. Pra nëse keni blerë një bono me vlerë 100.000 lekë vlerë nominale investimi me një normë kthimi 5% për një periudhë 1 vjecare, në fund të periudhës ju merrni 105.000 leke, por nëse inflacioni ka qenë shumë i lartë, ju nuk blini më të njëjtën shportë mallrash me të njëjtën sasi parash.

Sa i përket interesit, ai është i variueshëm dhe përcaktohet nga kërkesë oferta në treg (ankadet e Bankës së Shqipërisë). Në të gjitha rastet duhet të kuptoni që, për shkak të rrezikut të vogël edhe fitimi nga këto instrumente nuk është shumë i lartë.

U përgjigj Artan Gjergji. Lexo biografinë e tij.

Keni një pyetje për ekspertët tanë? Dërgojeni duke klikuar këtu!

*.*.*

Refuzim për Përgjegjësi Ligjore (Disclaimer)

Kjo faqe interneti dhe blog me pyetje përgjigje është një rubrikë me karakter informativ, e cila në vetvete ka për qëllim informimin dhe edukimin pa pagesë të qytetarëve, në lidhje me cështje të ndryshme ekonomike e financiare. Portali Politiko dhe Ekspertët që u përgjigjen pyetjeve të qytetarëve, as vec e vec e as së bashku, nuk marrin asnjë përgjegjësi ligjore për cdo veprim që ndërmerret dhe/apo keqpërdoret nga kushdo bazuar në informacionin e shpërndarë në këtë blog/rubrikë për qëllime edukative dhe informative.