Biden shpallet president i SHBA-ve/ Reagojnë liderët globalë, mesazhet që kanë përcjellë

Liderët botërorë kanë reaguar pas fitores së Joe Biden në garën për presidencialet e SHBA-së.
Kancelarja gjermane Angela Merkel ka uruar Biden, ndërsa vë theksin te sfidat e përbashkëta.

“Unë pres bashkëpunimin e ardhshëm me Presidentin Biden. Miqësia jonë transatlantike është e pazëvendësueshme nëse duam të zotërojmë sfidat e mëdha të kohës sonë”, thuhet në reagimin e Merkel.

Në të njëjtën linjë edhe kryeministri britanik Boris Johnson thotë se mezi pret të bashkëpunojë me Biden sidomos për temat si ndryshimet klimatike, tregtia dhe siguria.

“Urime Joe Biden për zgjedhjen si President i Shteteve të Bashkuara dhe Kamala Harris për arritjen e saj historike. Shtetet e Bashkuara janë aleati ynë më i rëndësishëm dhe unë pres që të punojmë ngushtë së bashku në përparësitë tona të përbashkëta, nga ndryshimi i klimës tek tregtia dhe siguria”, shkruan Johnson.

Krahas urimit, presidenti francez Emmanuel Macron thotë se kemi shumë rrugë për të bërë për sfidat aktuale.

“Amerikanët kanë zgjedhur Presidentin e tyre. Urime Joe Biden dhe Kamala Harris! Kemi shumë për të bërë për të kapërcyer sfidat e sotme. Le të punojmë së bashku" thuhet në reagimin zyrtar.

Kryeministri spanjoll Pedro Sanchez thekson bashkëpunimin mes dy vendeve.

“Populli Amerikan ka zgjedhur Presidentin e 46-të të Shteteve të Bashkuara. Urime Joe Biden dhe Kamala Harris. Ju urojmë fat të mbarë dhe të gjitha të mirat. Ne po shohim përpara për të bashkëpunuar me ju për të trajtuar sfidat përpara nesh”, tha ai.

Edhe kryeministri grek Kyriakos Mitsotakis ka uruar Biden për fitoren duke e vlerësuar si mik të vërtetëtë Greqisë.

“Urime Presidentit të Zgjedhur të SHBA Joe Biden. Joe Biden ka qenë një mik i vërtetë i Greqisë dhe unë jam i sigurt se nën presidencën e tij marrëdhëniet midis vendeve tona do të forcohen edhe më shumë", shkruan ai.

Kryeministri kanadez Justin Trudeau tha se ai “po priste me të vërtetë të punonte” me Biden dhe Zëvendës-Presidentin e zgjedhur Kamala Harris, pasi theksoi marrëdhëniet e ngushta të të dy vendeve.

Kryeministri i Irlandës Micheál Martin e përshkroi Bidenin si “një mik i vërtetë për kombin”.

Ndërsa ministri i Parë i Skocisë Nicola Sturgeon shkroi: “Urime nga Skocia Presidentit të Zgjedhur Joe Biden dhe Zëvendës Presidentes së Zgjedhur Kamala Harris që bën historinë.”

Partia Laburiste e Mbretërisë së Bashkuar dhe udhëheqësi i opozitës Keir Starmer tha se Bideni dhe Harris kanë drejtuar një fushatë mbi “vlerat që ne në Mbretërinë e Bashkuar ndajmë – mirësjellja, integriteti, dhembshuria dhe forca”.

Kryeministri Slloven Janez Janša, i cili në fillim të kësaj jave u bë një nga pak udhëheqësit botërorë që mbështeti publikisht Presidentin Trump – duke pretenduar se kryetari i tanishëm kishte fituar zgjedhjet ndërsa votat ende po numëroheshin – ka heshtur deri më tani.