“Braktiset” nga aleatët, kryeministri italian do të japë dorëheqjen

Qeveria italiane është e vendosur të shpërbëhet, pasi tre partnerë kryesorë të koalicionit vendosën të tërheqin mbështetjen e tyre ndaj kryeministrit Mario Draghi.

Kjo do të thotë zgjedhje të reja të përgjithshme, të dytat në katër vjet, që me gjasë do të mbahen në fund të shtatorit ose në fillim të tetorit.

Liga e Matteo Salvinit, Forza Italia e Silvio Berlusconit dhe Lëvizja Pesë Yje (M5S) e Giuseppe Conte vendosën të abstenojnë nga një votëbesimi në Senat të mërkurën.

Ai tani pritet t'i paraqesë dorëheqjen presidentit Sergio Mattarella të enjten.

Mattarella kishte refuzuar tashmë dorëheqjen e 74-vjeçarit më 14 korrik, pasi M5S abstenoi gjatë një votimi për një paketë stimuluese.

Presidenti Mattarella megjithatë i kishte bërë thirrje Draghit të rimbledhë partitë në parlament dhe të përpiqet të mbledhë mbështetjen e nevojshme për të qëndruar.

Draghi përsëriti thirrjet e tij për unitet në fjalimin e tij në Senat të mërkurën - por më pas Liga dhe Forza Italia njoftuan se nuk do të qëndronin më në koalicion për sa kohë që M5S do të ishte pjesë e tij.

Në kontrast të dukshëm me shumë kriza të mëparshme politike në Romë, shumë italianë i janë lutur Draghit të qëndrojë.

Një peticion në internet i quajtur "Draghi, qëndro", i nisur nga ish kryeministri italian Matteo Renzi mblodhi më shumë se 100,000 nënshkrime deri të hënën vonë.

Qindra qytetarë dhe udhëheqës politikë dolën gjithashtu në mitingje pro-Draghi në Romë, Milano dhe qytete të tjera.

Rreth 1,000 kryebashkiakë nga partitë politike rivale madje i kanë nënshkruar një letër të hapur Draghit duke e nxitur atë të qëndrojë.

Lobe të ndryshme, duke përfshirë një grup mjekësh, gjithashtu parashtruan lutjet "ju lutemi qëndroni" për shqetësimet për zbraztësirën e ndonjë lidershipi qeveritar mes infeksioneve në rritje të koronavirusit.

Të mërkurën, Draghi tha se mbështetja popullore për qeverinë e tij është "e paprecedentë dhe e pamundur të injorohet".

Ish-presidenti i Bankës Qendrore Evropiane (BQE) tha se ishte personalisht i prekur nga thirrjet spontane të punonjësve të zakonshëm mjekësorë italianë, të cilët ai i përshkroi si "heronj të pandemisë".

Burimi: Euronews