Covid-19, BE planifikon lëshimin e certifikatës dixhitale për të udhëtuar brenda unionit para verës

Bashkimi evropian po planifikon lëshimin e një certifikate dixhitale për të lejuar udhëtimet pa kufizime në të gjithë BE-në para verës, raporton BBC.

Qëllimi është që të mundësojë cilindo që vaksinohet kundër Covid-19, ose që ka rezultuar negativ ose është rikuperuar kohët e fundit nga virusi të udhëtojë brenda BE.

27 vendet anëtare do të vendosin se si të përdorin certifikatën e re dixhitale.

Pasaportat e vaksinave janë përballur me kundërshtime nga disa shtete anëtare të BE-së lidhur me shqetësimet se mund të jenë diskriminuese.

Disa argumentojnë se ato do të lejonin një pakicë të gëzonte udhëtimet jashtë vendeve të tyre pa kufizime ndërsa të tjerët, të tillë si të rinjtë që nuk shihen si përparësi, do vazhdojnë të përballen me masa të tilla si karantina. Zyrtarët e Komisionit Evropian e kanë bërë të qartë se duan të shmangin diskriminimin.

Një çështje tjetër e ngritur ka qenë se të dhënat për efikasitetin e vaksinave në parandalimin e një personi nga bartja ose kalimi i virusit janë të paplota.

Përpara njoftimit të BE, Organizata Botërore e Shëndetësisë (OBSH) tha se po punonte për "krijimin e një kornize ndërkombëtare të besuar" për udhëtime të sigurta, por që vaksinimet nuk duhet të jenë një kusht.

Çfarë do të thotë certifikata për udhëtimet në BE?

Duke folur në Bruksel të Mërkurën, Komisioneri Evropian i Drejtësisë Didier Reynders tha se certifikata e gjelbër dixhitale e propozuar do të ishte "për të gjithë qytetarët e BE, familjet e tyre kur ata largohen nga BE ose jetojnë jashtë".

"Do të jetë gjithashtu për Zonën Ekonomike Evropiane (EEA), sepse ne duam të punojmë me Norvegjinë dhe Islandën," tha ai, duke shtuar se Zvicra do të përfshihej gjithashtu.

Z. Reynders tha se kishte akoma shumë për të bërë për të vendosur certifikatën dixhitale, por qëllimi ishte që të vihej në funksionim përpara sezonit turistik veror.

Propozimi i Komisionit Evropian përcakton që çdo shtet anëtar i BE që lejon udhëtarët e vaksinuar të anashkalojnë kufizime të tilla si karantina duhet të pranojë certifikata nga shtetet e tjera brenda bllokut në të njëjtat kushte.

Ndërkohë, në Britani, Sekretari i Biznesit Këasi Këarteng tha se qeveria po shikonte idenë e pasaportave të vaksinës dhe kishte "diskutuar se cila është mënyra më e mirë për të vazhduar". "Ne po bëjmë debate, diskutime në lidhje me udhëtimet ... por unë mendoj se ajo që duhet të bëjmë është të drejtohemi nga të dhënat, ne duhet të shohim se si zhvillohet koronavirusi," i tha ai BBC.

Më shumë se një e treta e popullsisë së MB - gati 25 milion njerëz - kanë marrë të paktën një dozë të vaksinës, e cila nuk është më anëtare e Bashkimit Evropian.