VIDEO/Detaje nga sulmi terrorist me 3 të vdekur në Vienë, një nga autorët u vetëvra. Dyshohet për pengmarrje

Vjena u trondit mbrëmjen të hënës nga një sulm terrorist, ku sipas raportimeve janë konfirmuar 3 viktima dhe 15 të plagosur.

Policia e Vjenës ka përditësuar të dhënat e saj zyrtare nga sulmi ku ka raportuar se deri tani kanë mbetur të vdekur 3 persona (dy burra dhe një grua), teksa 15 persona kanë mbetur të plagosur rëndë, mes tyre një oficer policie.

Nga të dhënat që publikon policia austriake raportohet se sulmi është kryer nga të paktën një person i cili u qëllua dhe u ekzekutua nga policia ndërsa sulmi konsiderohet të ketë motive islamike.

Të dyshuarit mendohet se kanë pasur disa lloj armësh, të tipit AK 47 por edhe të llojeve të tjera, një prej të dyshuarve u pa se kishte veshur një jelek i cili u supozua se ishte eksploziv por rezultoi se nuk ishte i tillë.

Policia ka arritur të gjejë banesën e sulmuesit dhe e ka bastisur atë ndërkohë që autoritetet po vlerësojnë të gjithë videot dhe fotot e shpërndara në rrjetet sociale gjatë sulmit, dhe ngjarja është nën hetim e sipër.

Ministri i Brendshëm, Karl Nehammer, ka thënë se sulmi i së hënës besohet se është terrorist.

“Në këtë moment mund të konfirmoj se besojmë se kemi një sulm terrorist. Autorët përdorën armë të rënda. Ata që janë në shtëpi duhet të qëndrojnë në shtëpi. Ata që janë në një pub duhet të qëndrojnë atje. Ju lutemi shmangni qendrën e qytetit”, tha ministri, teksa nuk ka dashur të konfirmojë situatën e pengut.

Policia e Vjenës u ka bërë thirrje njerëzve që të mos shpërndajnë video dhe fotografi nëpër rrjetet sociale.

“Kjo gjë rrezikon forcat policore si dhe popullsinë civile”, ka thënë ajo përmes një postimi në Twitter.

Por ndërkohë në “Twitter” janë publikuar imazhe dhe video nga ajo që po ndodh në Vjenë. Në një prej tyre dyshohet se policia ka zhveshur disa të dyshuar që ndodhen me duart lart.

Oskar Deutsch, i cili është në krye në komunitetit të hebrenjve në Vjenë, ka deklaruar se të shtënat kanë ndodhur në rrugën ku gjendet sinagoga kryesore e qytetit, por ende nuk dihet nëse ky institucion ka qenë shënjestër.