Donald Trump kërkon anulimin e menjëhershëm të gjyqit ndaj Netanyahut

Presidenti i Shteteve të Bashkuara, Donald Trump, ka bërë thirrje për anulimin e gjyqit për korrupsion ndaj kryeministrit izraelit Benjamin Netanyahu, të cilin e cilësoi si një “gjueti shtrigash” të papranueshme kundër “heroit” të Izraelit.

“Një gjueti e tillë shtrigash ndaj një njeriu që ka dhënë kaq shumë, është e paimagjinueshme për mua. Ai meriton diçka shumë më të mirë se kjo dhe edhe vetë shteti i Izraelit po ashtu. Gjyqi ndaj Bibi Netanyahut duhet të ANULOHET MENJËHERË,” shkroi Trump në rrjetin e tij social Truth Social.

Nëse kjo nuk ndodh, Trump theksoi se duhet “t’i jepet falje një heroi të madh që ka bërë kaq shumë për shtetin e tij.”

Sipas tij, “Ishin Shtetet e Bashkuara të Amerikës që shpëtuan Izraelin, dhe tani do të jenë përsëri Shtetet e Bashkuara të Amerikës që do të shpëtojnë Bibi Netanyahun.”

Gjyqi i shumëpërfolur ndaj Netanyahu ka nisur në maj të vitit 2020, por është shtyrë disa herë për shkak të luftës në Rripin e Gazës dhe zhvillimeve të fundit në Liban. Kryeministri izraelit përballet me akuza për mashtrim, shpërdorim detyre dhe ryshfet

Ai dyshohet se ka dhënë favore për kompaninë e telekomunikacionit Bezeq kur mbante postin e ministrit të Komunikimeve, si dhe ka pranuar dhurata luksoze nga miq të tij miliarderë.

Në një postim të gjatë në Truth Social, Trump shprehet i tronditur që “shteti i Izraelit, i cili sapo kaloi një nga momentet më të mëdha të historisë së tij nën udhëheqjen e Bibi Netanyahut, po vazhdon këtë gjyq qesharak ndaj kryeministrit të tij.”

Ai thotë se ka kaluar “ferrin” bashkë me Netanyahun gjatë përballjes me Iranin, të cilin e përshkruan si “një armik të ashpër dhe të përhershëm të Izraelit.” Trump e cilëson Netanyahun si një “luftëtar më shumë se çdo tjetër në historinë e Izraelit”, duke shtuar se së bashku “po luftonin për mbijetesën e Izraelit”.

Duke ironizuar akuzat ndaj Netanyahu-t, Trump përmendi që gjyqi është për “puro, lodra Bugs Bunny dhe akuza të tjera të padrejta me qëllim që t’i shkaktojnë dëm të madh.”

Ai kujton gjithashtu se kjo është hera e parë në histori që një kryeministër në detyrë i Izraelit përballet me një proces gjyqësor të tillë, të cilin e quan “një shfaqje horror politike që zgjat prej majit 2020”.

Trump përfundon postimin duke e quajtur të papranueshme “këtë çmenduri të ashtuquajtur të drejtësisë”, ndërsa ngre bashkëpunimin që ka pasur me Netanyahun gjatë presidencës së tij.

“Ndoshta nuk ka asnjë që ka bashkëpunuar më mirë me presidentin e SHBA-së, mua, sesa Bibi Netanyahu. Është koha që Amerika ta shpëtojë përsëri”, përfundon Trump.