Erdogan shuan shpresat e Suedisë: Nuk do e lejojmë të anëtarësohet në NATO

Suedia nuk duhet të presë që Turqia të mbështesë anëtarësimin e saj në NATO, tha presidenti turk Tajip Erdogan, disa ditë pasi një kopje e Kuranit u dogj në një protestë në Stokholm.

Suedia aplikoi për t'u bashkuar me NATO-n pasi Rusia pushtoi Ukrainën, por ka nevojë që Turqia, tashmë një anëtare, të miratojë. Protestuesit kurdë në Suedi varën një figurë të zotit Erdogan këtë muaj, pasuar nga djegia e Kuranit.

“Suedia nuk duhet të presë mbështetje nga ne për NATO-n.  Është e qartë se ata që shkaktuan një turp të tillë para ambasadës së vendit tonë, nuk mund të presin më asnjë dashamirësi nga ne për aplikimin e tyre”, tha ai.

Protestës së së shtunës, por jo djegia e vetë librit të shenjtë, iu dha miratimi paraprak nga autoritetet suedeze.

Erdogan dënoi protestën e fundit, të kryer nga një politikan i ekstremit të djathtë nga një parti daneze, si blasfemi që nuk duhet mbrojtur nga liria e fjalës. Edhe qeveria suedeze kritikuan protestën.

"Suedia ka një liri të gjerë të shprehjes, por kjo nuk do të thotë që qeveria suedeze, ose unë, mbështesim mendimet e shprehura," tha ministri i Jashtëm suedez Tobias Billstrom.

Duke iu përgjigjur komenteve të Erdoganit, Billstrom tha se donte të kuptonte saktësisht se çfarë tha lideri turk përpara se të komentonte.

“Suedia do të respektojë marrëveshjen që ekziston midis Suedisë, Finlandës dhe Turqisë në lidhje me anëtarësimin tonë në NATO”, shtoi ai.

Suedia, së bashku me Finlandën, aplikuan për t'u bashkuar me NATO-n pasi Rusia pushtoi Ukrainën, por protestat e fundit kanë rritur tensionet.

Duke qenë se Turqia është tashmë një anëtare e NATO-s, ajo mund të bllokojë anëtarësimin e një vendi tjetër dhe tashmë ka bërë disa kërkesa ndaj Suedisë. Kjo përfshin ekstradimin e disa kurdëve që ajo pretendon se janë terroristë.

Burimi: BBC