Greqia dhe Spanja kërkojnë miratimin e 'çertifikatës' së vaksinimit, BE: Të rritet prodhimi dhe shpërndarja e dozave

Çertifikatat e vaksinave të BE-së mund të jenë gati për t'u përdorur brenda tre muajve, tha Presidentja e Komisionit Evropian, Ursula von der Leyen në një konferencë shtypi në Bruksel.

"Afati kohor, tre muaj ka të bëjë me zhvillimin teknik, kështu që na duhen të paktën tre muaj për zhvillimin teknik të një sistemi ndërveprues në nivelin evropian. Ka shumë punë për të bërë nga Komisioni dhe shumë punë për të bërë teknikisht për vendet anëtare, shpjegoi von der Leyen.

Shtetet e BE-së të ndara

Vendet e Evropës Jugore që janë të varura nga turizmi, si Greqia dhe Spanja e mbështesin idenë e  çertifikatave, ndërsa vendet veriore të BE-së si Gjermania kanë qenë deri tani skeptikë nëse një sistem i tillë do të funksiononte.

"Së pari duhet të zgjidhet qartë që njerëzit e vaksinuar të mos jenë më infektues," tha kancelarja gjermane Angela Merkel në një intervistë për të përditshmen Frankfurter Allgemeine Zeitung.

"Për sa kohë që numri i atyre që janë vaksinuar është akoma shumë më i vogël se numri i atyre që janë duke pritur për vaksinim, shteti nuk duhet t'i trajtojë të dy grupet ndryshe", shtoi ajo.

"Ndjej se ka shumë konfuzion ndonjëherë për këtë temë," tha presidenti francez Emmanuel Macron, duke folur në një konferencë shtypi pas samitit të enjten.

"Nëse ne arrijmë të rihapim vende të caktuara, nuk mund të kushtëzojmë mundësinë e tyre të vaksinimit, edhe pse nuk do të kishim hapur vaksinimin për më të riun", theksoi ai.

Shpejtimi i prodhimit dhe shpërndarjes

Krerët e shteteve dhe qeverive të BE-së diskutuan për gjendjen epidemiologjike në kontinent, ku gjithashtu ranë dakord t'i japin përparësi rritjes së prodhimit dhe shpërndarjes së vaksinave, duke thënë se ata do të punojnë me industrinë farmaceutike për të lehtësuar procesin.

"Prioriteti ynë kryesor tani është përshpejtimi i prodhimit dhe shpërndarjes së vaksinave në të gjithë Bashkimin Evropian dhe kjo është arsyeja pse ne mbështesim përpjekjet e Komisionit për të punuar me industrinë për të identifikuar pengesat, për të garantuar zinxhirët e furnizimit dhe për të rritur prodhimin dhe ne duam më shumë parashikueshmëri dhe transparencë për të siguruar që kompanitë farmaceutike të jenë në përputhje me angazhimet e tyre", tha Presidenti i Këshillit Evropian Charles Michel.

Ai gjithashtu u shpreh se blloku prej 27 anëtarësh duhet të vazhdojë të investojë në kërkimin e vaksinave, në mënyrë që të luftojë kundër çdo varianti të ri COVID-19 që mund të paraqitet.

Udhëheqësit e BE-së do të mbajnë një tjetër takim për të diskutuar mbi sigurinë dhe mbrojtjen, si dhe marrëdhëniet me vendet në Afrikën e Veriut dhe Lindjen e Mesme.