“I tregojmë botës se Putin dështoi”, Liderët botërorë reagojnë ndaj anëtarësimit të Finlandës në NATO

Reagimet nga liderët botërorë po vërshojnë pasi Finlanda u anëtarësua zyrtarisht në NATO të martën. Këtu janë disa nga reagimet kryesore sipas CNN:

Presidenti i SHBA Joe Biden: “Sot shtatëdhjetë e katër vjet më parë – ndërsa Shtetet e Bashkuara dhe 11 vende të tjera u mblodhën për të formuar Organizatën e Traktatit të Atlantikut të Veriut – Presidenti Truman tha, “nëse ka ndonjë gjë të pashmangshme në të ardhmen, është vullneti i njerëzit e botës për liri dhe për paqe”. “Sot, ky vullnet është më i fortë se kurrë me shtimin e Finlandës në NATO”.

Ai tha gjithashtu se mezi priste që të mirëpresë Suedinë në NATO “sa më shpejt të jetë e mundur”.

Presidenti ukrainas Volodymyr Zelensky ka uruar Finlandën dhe presidentin e saj Sauli Niinistö në një postim në Twitter. "NATO u bë garancia e vetme efektive e sigurisë në rajon në mes të agresionit rus. Ne presim që #Samiti i NATO-s në Vilnius ta afrojë Ukrainën me qëllimin tonë euroatlantik," shtoi ai.

Sekretari i Përgjithshëm i NATO-s Jens Stoltenberg: Shefi i aleancës ushtarake të udhëhequr nga SHBA tha se presidenti rus Vladimir Putin kishte “dështuar” në përpjekjen e tij për të “përplasur derën e NATO-s” në mes të pushtimit të tij në Ukrainë.

“Presidenti Putin donte të mbyllte derën e NATO-s. Sot i tregojmë botës se ai dështoi, se agresioni dhe frikësimi nuk funksionon. Në vend të më pak NATO-s, ai ka arritur të kundërtën – më shumë NATO – dhe dera jonë mbetet fort e hapur”, tha Stoltenberg në një konferencë shtypi në Bruksel së bashku me Niinistö.

Finlanda tani ka "miqtë dhe aleatët më të fortë në botë", deklaroi Stoltenberg teksa mirëpriti vendin në aleancë.

Kryeministri britanik Rishi Sunak: “Finlandë, mirë se erdhe në NATO”, shkroi ai në Twitter.                           

Kancelari gjerman Olaf Scholz: "Ky është një lajm i mirë dhe një fitore për sigurinë transatlantike," shkroi ai në Twitter. "Me #Finlandën, aleanca jonë e mbrojtjes ka fituar një mik të fortë." Scholz gjithashtu dha mbështetjen e tij për ofertën e Suedisë për t'u bashkuar me aleancën ushtarake. "Aderimi në pritje i Suedisë ka mbështetjen tonë të plotë!"

Kryeministri kroat Andrej Plenkoviç: “Urime dhe mirëseardhje të ngrohtë në Finlandë si aleatin tonë të ri @NATO! Është një ditë historike që e bën Aleancën tonë më të fortë. Shpresojmë se së shpejti do të jemi në gjendje të mirëpresim edhe Suedinë si një anëtare e re e aleancës”, shkroi ai në Twitter.

Kryeministri i Republikës Çeke Petr Fiala: “Urime Finlandës për anëtarësimin në Aleancën e Atlantikut të Veriut, për të cilën do të jetë një pasuri e madhe. Ky është një moment historik për Evropën dhe për sigurinë e saj. Shpresoj që Hungaria dhe Turqia do ta ratifikojnë pranimin e Suedisë dhe se ajo gjithashtu së shpejti do të bëhet anëtare e NATO-s”, tha Fiala në një postim në Twitter.

Shefi i politikës së jashtme të Bashkimit Evropian, Josep Borrell: “Unë mirëpres ngrohtësisht pranimin e #Finlandës në NATO. Ky hap historik do të forcojë Aleancën, do të përforcojë sigurinë evropiane dhe transatlantike dhe do të kontribuojë në nxitjen e mëtejshme të partneritetit tonë strategjik #BE-NATO”, tha ai në përgjigje të Niinistö.