Investigimi i BBC: Roja bregdetare greke i dhunoi dhe i hodhi emigrantët në det

Roja bregdetare greke ka shkaktuar vdekjen e dhjetëra emigrantëve në Mesdhe gjatë një periudhe trevjeçare, thonë dëshmitarët, duke përfshirë nëntë të cilët u hodhën qëllimisht në ujë.

Të nëntë janë në mesin e më shumë se 40 personave që dyshohet se kanë vdekur si pasojë e dëbimit me forcë nga ujërat territoriale greke, ose të nxjerra përsëri në det pasi arritën në ishujt grekë, shkruan BBC.

Roja bregdetare greke i tha hetimit tonë se kundërshton me forcë të gjitha akuzat për veprimtari të paligjshme.

Ne treguam pamjet e 12 personave duke u ngarkuar në një varkë të rojes bregdetare greke dhe më pas të braktisur në një gomone tek një ish-oficer i lartë i rojes bregdetare greke. Kur u ngrit nga karrigia e tij dhe me mikrofonin ende të ndezur, ai tha se ishte "qartësisht i paligjshëm" dhe "një krim ndërkombëtar".

Qeveria greke është akuzuar prej kohësh për kthime të detyruara - duke i shtyrë njerëzit drejt Turqisë, prej nga kanë kaluar, gjë që është e paligjshme sipas ligjit ndërkombëtar.

Në pesë nga incidentet, emigrantët thanë se u hodhën direkt në det nga autoritetet greke. Në katër prej këtyre rasteve ata shpjeguan se si kishin zbritur në ishujt grekë, por u gjuajtën. Në disa incidente të tjera, migrantët thanë se ishin futur në gomone të fryrë pa motorë, të cilat më pas u shfrynë, ose dukej se ishin shpuar.

Një nga rrëfimet më rrëqethëse u dha nga një burrë nga Kameruni, i cili thotë se u ndoq nga autoritetet greke pasi zbarkoi në ishullin Samos në shtator 2021.

Si të gjithë njerëzit që intervistuam, ai tha se po planifikonte të regjistrohej në tokën greke si azilkërkues.

“Ne mezi ishim ankoruar dhe policia erdhi nga pas”, na tha ai. "Ishin dy policë të veshur me të zeza, dhe tre të tjerë me rroba civile. Ata ishin të maskuar, i shihje vetëm sytë."

Ai dhe dy të tjerë - një tjetër nga Kameruni dhe një burrë nga Bregu i Fildishtë - u transferuan në një varkë të rojes bregdetare greke, tha ai, ku ngjarjet morën një kthesë të tmerrshme.

“Ata filluan me tjetrin kamerunian. E hodhën në ujë. Burri i Fildishtë tha: ‘Më shpëto, nuk dua të vdes… dhe më pas vetëm dora e tij ishte mbi ujë dhe trupi i tij ishte poshtë. Ngadalë dora i rrëshqiti poshtë dhe uji e përfshiu. I intervistuari ynë thotë se rrëmbyesit e tij e kanë rrahur. Ishte sikur po goditnin një kafshë", ka thënë ai.

Avokatët e të mbijetuarit po kërkojnë që autoritetet greke të hapin një çështje vrasjeje të dyfishtë.