Ish-marinsi amerikan përlotet ndërsa e konsideron 'katastrofë' tërheqjen e SHBA-ve nga Afganistani

Anëtarët e shërbimit aktiv dhe veteranët kanë përshkruar me detaje rrëqethëse masakrën dhe vdekjen që panë gjatë tërheqjes kaotike të SHBA-ve nga Afganistani. Ish-rreshteri i marinës amerikane Tyler Vargas-Andrews ishte midis atyre që dhanë dëshmi në komitetin e punëve të jashtme.

Vargas-Andreës shpërtheu në lot ndërsa tregoi për momentin më vdekjeprurës në evakuimin e SHBA-së në gusht 2021 - një sulm vetëvrasës në aeroportin e Kabulit që vrau 170 afganë dhe 13 ushtarakë dhe gra amerikane.

Kujdes, ka kontent grafik: Ai tregoi për erën e keqe të mishit të njeriut nën një shtëllungë të madhe tymi ndërsa britmat e fëmijëve, grave dhe burrave mbushën hapësirën përreth aeroportit pasi dy kamikazë sulmuan turmat e afganëve që shpresonin të iknin nga vendi me një avion.

Ai tha se marinsave dhe të tjerëve që ndihmuan në operacionin e evakuimit iu dhanë përshkrime të njerëzve që besohej se po komplotonin një sulm përpara se të ndodhte.

Vargas-Andrews, krahu i djathtë dhe këmba e djathtë e të cilit duhej të amputoheshin si rezultat i bombardimeve, tha se ai dhe të tjerët vunë re dy burra që përputheshin me përshkrimet dhe silleshin në mënyrë të dyshimtë, dhe përfundimisht i kishin në shënjestër, por kurrë nuk morën një përgjigje për të ndërmarrë veprime mbi ta (pra, për t`i qëlluar).

"Askush nuk u mbajt përgjegjës," i tha z. Vargas-Andrews komitetit. "Askush nuk ishte dhe askush nuk është, deri më sot."

"Tërheqja ishte një katastrofë për mendimin tim."

Tërheqja i dha fund luftës më të gjatë të Amerikës - një fushatë 20-vjeçare që pa dhjetëra mijëra afganë të vdekur dhe më shumë se 2,400 amerikanë. Mijëra afganë nxituan në aeroportin e Kabulit në gusht 2021 me shpresën për t'i shpëtuar regjimit të ri taleban që kishte pushtuar kryeqytetin shumë më shpejt nga sa kishte parashikuar inteligjenca amerikane.

Dëshmitarët në seancën e së mërkurës kujtuan se kishin parë nëna që mbanin foshnja të vdekura dhe talebanët të qëllonin dhe rrihnin brutalisht njerëzit në aeroport. Ato përshkruanin përpjekjen e dëshpëruar të SHBA-së për të shpëtuar qytetarët amerikanë dhe aleatët afganë, duke fajësuar planifikimin dhe mbështetjen e pamjaftueshme.

"Unë shoh fytyrat e të gjithë atyre që nuk mundëm t'i shpëtonim, atyre që lamë pas," tha Aidan Gunderson, një mjek i ushtrisë që ishte vendosur në Abbey Gate, zona e aeroportit ku shpërtheu bomba. "Pyes veten nëse aleatët tanë afganë ikën në vend të sigurt apo u vranë nga talebanët”.

Presidenti Biden zbatoi premtimin e Donald Trump për t'u larguar nga Afganistani - pavarësisht rënies së kryeqytetit afgan. Dëshmitarët bënë thirrje për veprim për të ndihmuar mijëra aleatë afganë që punuan së bashku me ushtarët amerikanë dhe që tani janë në harresë në SHBA ose në Afganistan.

"Veteranët tanë dinë diçka tjetër që ky komitet mund të bëjë mirë ta konsiderojë: ne mund të kemi mbaruar me Afganistanin, por nuk ka përfunduar me ne," i tha komitetit nënkoloneli në pension Scott Mann. Seanca dëgjimore e udhëhequr nga republikanët është e para nga ajo që pritet të jetë një seri që shqyrton tërheqjen e SHBA-ve nga Afganistani.

Zëdhënësi i Departamentit të Mbrojtjes, nënkoloneli Rob Lodewick tha të mërkurën se rishikimi i mëparshëm i Pentagonit i sulmit në aeroport nuk rezultoi në asnjë identifikim paraprak të një sulmuesi të mundshëm dhe as në ndonjë kërkesë për "përshkallëzim të rregullave ekzistuese të angazhimit" që rregullojnë përdorimin e forcës nga trupat amerikane.

Muajin e kaluar, një raport nga inspektori i përgjithshëm i SHBA-së për Afganistanin, John Sopko, zbuloi se veprimet e ndërmarra nga administrata Trump dhe Biden ishin thelbësore për rënien e papritur të qeverisë dhe ushtrisë afgane. Raporti fajësonte të gjitha administratat amerikane që kur forcat amerikane pushtuan në 2001 për dështimin në ndërtimin e një ushtrie të aftë dhe të qëndrueshme afgane përpara se të përfundonin tërheqjen e trupave amerikane në gusht 2021.

Burimi: SkyNews