Katër presidentë do të udhëtojnë drejt Kievit për të takuar Zelenskyn, zhvillimet e fundit nga lufta në Ukrainë

Presidenti polak, lituanez, letonez dhe estonez po udhëtojnë për në kryeqytetin ukrainas, Kiev për të takuar presidentin Zelensky, tha një këshilltar i liderit polak.

Presidenti amerikan Joe Biden ka thënë për herë të parë se “diktatori” Vladimir Putin po kryen gjenocid në Ukrainë.

"Po, e quajta gjenocid. Është bërë gjithnjë e më e qartë se Putini thjesht po përpiqet të fshijë idenë e të qenit,  të aftë të jesh ukrainas," tha Biden.

Shtëpia e Bardhë po përgatitet t'i dërgojë Ukrainës armë të tjera prej 750 milionë dollarësh, sipas mediave amerikane.

Presidenti i SHBA Joe Biden dhe kryeministri i Mbretërisë së Bashkuar Boris Johnson kanë zhvilluar një bisedë telefonike, ku diskutuan se si të rrisin presionin ekonomik ndaj Rusisë dhe t'i jepet fund varësisë perëndimore në naftën dhe gazin e saj.

Në një fjalim në parlamentin lituanez, presidenti ukrainas Zelensky tha se Bashkimi Evropian ishte ende shumë hezitues në vendosjen e sanksioneve ndaj Moskës.

Ndërkohë Ukraina dhe Rusia po ndërtojnë forcat e tyre ushtarake në rajonin lindor të Ukrainës, Donbas. Raportet dhe imazhet satelitore tregojnë se Rusia po ndërton trupa dhe pajisje ushtarake në tre vende përgjatë kufirit të saj me Ukrainën, rajonet Belgorod dhe Voronezh, si dhe rreth qytetit të Matveev Kurgan në jug.

Ukraina thotë se ka arrestuar politikanin më të lartë pro-rus të vendit, Viktor Medvedchuk. Lideri i partisë opozitare ishte nën arrest shtëpiak i dyshuar për tradhti, por u arratis menjëherë pas pushtimit rus

Presidenti Zelensky i ofroi Rusisë që ta shkëmbente atë me ukrainasit e kapur.

SHBA thotë se është "thellësisht e shqetësuar" nga raportet se armët kimike janë përdorur nga forcat ruse duke sulmuar qytetin port jugor të Mariupolit.

Forcat ukrainase kanë thënë se Rusia planifikon të nisë një sulm në fabrikën e çelikut Azovstal në Mariupol, e cila është bërë pika qendrore e përpjekjeve të Rusisë për të kapur qytetin port kyç të Mariupolit.

Burimi: BBC