Kriza e emigantëve në kufi me Bjellorusinë, kryeministri polak pritet t'i drejtohet  NATO-s për ndihmë

Polonia, Lituania dhe Letonia po diskutojnë që t'i kërkojnë NATO-s që të mbajë bisedime urgjente për krizën e migracionit në kufirin me Bjellorusinë, citohet të ketë thënë kryeministri i Polonisë.

Duke folur për mediat shtetërore polake, kryeministri Mateusz Morawiecki tha se së bashku me homologët e tij nga dy shtetet baltike, po diskutonin nëse do t'i kërkonin aleancës për bisedime sipas nenit 4 të traktatit.

Artikulli lejon çdo aleat të kërkojë konsultime nëse ndjen se integriteti i tij territorial, pavarësia politike ose siguria kërcënohet.

"Duket se nevojitet gjithnjë e më shumë. Sepse nuk mjafton vetëm të shprehim publikisht shqetësimin tonë - tani nevojiten hapa konkretë dhe angazhim i të gjithë aleancës", tha Morawiecki, raportojnë mediat e huaja.

Tensionet në kufi dukej se u përshkallëzuan javën e kaluar, me autoritetet polake që postuan video të grupeve të mëdha të emigrantëve në kufirin me Bjellorusinë, duke u përpjekur të kalonin në BE.

Bashkimi Evropian thotë se Bjellorusia ka zhvilluar një "luftë hibride" duke lehtësuar aksesin e emigrantëve për muaj të tërë në kufirin e jashtëm të bllokut si hakmarrje për sanksionet ndaj regjimit.

Vendet në kufi janë kundërpërgjigjur duke përforcuar kufijtë e tyre, duke kërkuar të bllokojnë rrugën e sapohapur të migracionit.

Një zëvendësministër i brendshëm nga Polonia tha dje se më shumë emigrantë po mbërrijnë pranë pikës kufitare polake të Kuźnica nga pala bjelloruse.

Por për shkak të gjendjes së jashtëzakonshme në Poloni, gazetarët dhe punonjësit e të drejtave të njeriut nuk mund të udhëtojnë në kufi për të verifikuar.

Morawiecki u zotua se kufiri i Polonisë me Bjellorusinë "do të jetë një pengesë efektive dhe përfundimtare" ndaj veprimeve të presidentit bjellorus Alexander Lukashenko. "Nuk ka dyshim se gjërat kanë shkuar shumë larg", tha Morawiecki.

Shumë emigrantë janë bllokuar tani në kampe të improvizuara dhe në mot të ftohtë, pasi Polonia ka përforcuar kufirin e saj me 15,000 ushtarë, përveç rojeve kufitare dhe policisë.

Shumica po ikin nga konflikti, varfëria ose mungesa e shpresës në Siri dhe Irak dhe shpresojnë të arrijnë në Gjermani ose diku në Evropën Perëndimore. Të shtunën, autoritetet polake raportuan se trupi i një të riu sirian u gjet pranë kufirit, viktima e 11 në mes të krizës.