Kriza e emigrantëve/ Papa shkon në ishullin grek, takon refugjatët e strehuar në kontejnerë

Papa Françesku do të shkojë sot në ishullin grek, Lesbos, në zemër të një vale masive migracioni në Evropë. Më herët ai kritikoi ashpër qeveritë evropiane për trajtimin që po iu bëjnë emigrantëve.

84-vjeçari do të qëndojë vetëm dy orë në ishull. Papa do të vizitojë një qendër strehimi të emigrantëve, ku azilkërkuesit jetojnë në kontejnerë të bardhë të OKB-së.

Kampi është i rrethuar me tela me gjemba. Papa ndodhet në një vizitë pesë-ditore në Qipro dhe Greqi, ku në fokus ka qenë tema e migracionit.

Në Qipro, ai denoncoi "kulturën e indiferencës" të treguar ndaj emigrantëve dhe në Athinë, Papa u kërkoi qeverive evropiane të pranojnë emigrantë "në proporcion me mundësitë e secilit vend".

“Evropa vazhdon të ngecë, duke u bërë pre e formave të interesit vetjak nacionalist në vend që të jetë një motor solidariteti. Nganjëherë, duket e lëkundur dhe e pakoordinuar. Në të kaluarën, konfliktet ideologjike penguan ndërtimin e urave midis Evropës Lindore dhe Perëndimore. Sot çështja e migrimit ka çuar në çarje edhe mes jugut dhe veriut”, deklaroi ai

Françesku tha se emigrantët dhe refugjatët po jetojnë sot përmes një “Odiseje të tmerrshme moderne”, duke iu referuar poemës epike të lashtë greke.

Më shumë se 1 milion njerëz, shumë prej të cilëve ikin nga lufta në Irak dhe Siri, kaluan nga Turqia në Greqi gjatë 2015 dhe 2016, ndërs Lesbos ishte pika më e ngarkuar e kalimit.

Françesku do të takohet sot me emigrantët, duke kaluar pak kohë me familjet brenda shtëpive të tyre me kontejnerë.

Greqia ka ndërtuar kohët e fundit një mur çeliku përgjatë një seksioni të kufirit tokësor greko-turk dhe po ndalon anijet që transportojnë emigrantë nga pala turke.

Ajo mohon pretendimet se po kryen deportime të përmbledhura të emigrantëve që arrijnë në territorin grek, por grupet e të drejtave të njeriut thonë se kanë ndodhur shumë kundërvajtje të tilla.

Përpara ndalesës së të dielës nga Françesku, grupet e të drejtave të njeriut kanë rritur kritikat e tyre ndaj trajtimit të emigrantëve nga Greqia dhe ndaj politikave më të ashpra të migracionit midis 27 anëtarëve të BE-së.

Amnesty International tha se kampet e reja të paraburgimit të financuara nga BE në ishujt grekë ishin në kundërshtim me angazhimet e Athinës për të ofruar mbrojtje ndërkombëtare për ata që kanë nevojë.

Burimi: AP