Mbytja e anijeve, OKB: Mbi 1600 emigrantë humbën jetën këtë vit, 23 mijë që nga 2014-ta

Vdekja e të paktën 27 emigrantëve në Kanalin Anglez ka tronditur Britaninë dhe Francën, por mbytjet e anijeve nuk janë të rralla në ujërat evropiane.

Zyrtarët e OKB-së vlerësojnë se rreth 1600 njerëz kanë humbur jetën ose rezultojnë të zhdukur në detin Mesdhe vetëm këtë vit.

Ndërsa 35 emigrantë kanë humbur jetën ose mbeten të zhdukur në Kanal që nga fillimi i vitit 2021.

Këtë vit, rruga më e ngarkuar dhe më vdekjeprurëse e emigrantëve për në Evropë është Mesdheu Qendror, ku njerëzit udhëtojnë me varka të mbushura me njerëz nga Afrika veriore.

Rruga është bërë porta kryesore për në Evropë për migrantët që përpiqen të hyjnë në kontinent me ndihmën e kontrabandistëve të qenieve njerëzore.

Të enjten, roja bregdetare e Italisë raportoi se kishin shpëtuar rreth 300 emigrantë në brigjet e Lampedusa.

Autoritetet thanë se anija e mbipopulluar kishte hasur në probleme në kushte të vështira detare dhe disa njerëz tashmë kishin rënë në ujë. Tetë fëmijë ishin në mesin e 296 personave të shpëtuar, tha roja bregdetare.

Numri i të vdekurve në Mesdhe këtë vit është më i lartë se viti 2020, por aspak unik.

Organizata Ndërkombëtare për Migracionin (IOM) vlerëson se 23,000 njerëz kanë humbur jetën që nga viti 2014, ndërsa përpiqeshin të arrinin në Evropë nga Afrika veriore, duke përfshirë më shumë se 5,000 njerëz vetëm në vitin 2016.

Në të njëjtën periudhë shtatëvjeçare, rreth 166 persona kanë vdekur në Kanalin Anglez.

Vetëm javën e kaluar, 85 njerëz humbën jetën në dy incidente të veçanta ndërsa përpiqeshin të arrinin në Itali nga Libia, tha zëdhënësi i IOM-it në Itali, Flavio di Giacomo.

Sipas Komisionerit të Lartë të OKB-së për Refugjatët, rreth 60,000 njerëz kanë mbërritur në Itali përmes detit këtë vit.

Ndërkohë, rreth 1200 të tjerë kanë vdekur ose janë zhdukur gjatë udhëtimit, pjesërisht bazuar në informacionet nga të mbijetuarit e mbytjeve të anijeve.

Trafiku i emigrantëve është rritur gjithashtu në rrugën edhe më të rrezikshme të Oqeanit Atlantik për në ishujt Kanarie të Spanjës.

IOM ka regjistruar 900 viktima në rrugën e Kanarinave këtë vit, tha di Giacomo, por numri i vërtetë mund të jetë dyfish" dhe askush nuk po i kushton shumë vëmendje".

Më shumë se 400 njerëz u shpëtuan vetëm këtë javë ndërsa përpiqeshin të arrinin ishujt. Grupet e të drejtave të njeriut shpesh kritikojnë qeveritë evropiane se nuk kanë bërë më shumë për të shpëtuar emigrantët që përpiqen të arrijnë në kontinent.

Vitet e fundit, Evropa ka vënë më shumë theksin në trajnimin dhe pajisjen e rojes bregdetare libiane për të kapur anijet me emigrantë përpara se të arrijnë në ujërat evropiane.

Burimi: Euronews