Mes frikës nga sulmet, Ukraina feston sot Ditën e Pavarësisë, shënohen 6 muaj nga fillimi i luftës ruse

Ukraina feston sot Ditën e Pavarësisë, e cila përkon edhe me 6 muaj luftë të nisur nga 24 shkurti, kur trupat ruse të Vladimir Putin hynë në territorin ukrainas.

Presidenti Vladimir Putin ka paralajmëruar për sulme të tjera ruse, raporton BBC. Zelenskyy i bëri thirrje qytetarëve ukrainas të jenë vigjilentë dhe të kudesshëm, sidomos në Kiev dhe Kharkiv ku kërkoi që të respektohet shtetrrethimi dhe sirenat e sulmeve ajrore.

“Sot është një ditë e rëndësishme për të gjithë ne. Dhe kjo është arsyeja pse kjo ditë, për fat të keq, është gjithashtu e rëndësishme për armikun tonë. Ne duhet të jemi të vetëdijshëm se provokimet e shëmtuara ruse dhe sulmet brutale janë të mundshme. Forcat e Armatosura të Ukrainës, inteligjenca jonë, shërbimet speciale do të bëjnë gjithçka për të mbrojtur njerëzit - sa më shumë që të jetë e mundur. Dhe ne me siguri do t'i përgjigjemi çdo manifestimi të terrorit rus”, deklaroi presidenti ukrainas.

Prej fillimit të luftës ruse, kanë humbur jetën mijëra civilë dhe ushtarë. Një pjesë e qyteteve ukrainase janë shkatërruar plotësisht si pasojë e bombardimeve, ndërsa në disa të tjera ka rifilluar jeta normale.

Momentet kyçe në 6 muaj luftë

24 shkurt: Vladimir Putin fillon pushtimin e Ukrainës, duke e përshkruar atë si një "operacion ushtarak special" me qëllim "çmilitarizimin dhe denazifikimin" e vendit.

7 mars: Ukraina dhe Rusia bien dakord të hapin korridoret humanitare për të evakuuar civilët nga qyteti i rrethuar i Mariupolit, por përpjekjet dështojnë ndërsa bombardimet ruse vazhdojnë.

30 mars: Rusia së pari njofton se do të frenojë sulmin e saj në Kiev. Më vonë ajo do të zhvendosë fokusin e saj në Ukrainën lindore.

1 Prill: Shfaqen tmerret në Bucha pasi trupat ruse filluan të tërhiqen nga qyteti afër Kievit. Trupat janë gjetur të shtrirë në rrugë, gjë që tregon për një masakër civile.

20 maj: Rusia merr kontrollin e fabrikës së çelikut Azovstal në Mariupol pas një rrethimi të gjatë.

25 qershor: Qyteti lindor i Severodonetsk bie në duart e Rusisë, me fqinjin Lysychansk më 3 korrik, duke i dhënë Moskës kontroll pothuajse të plotë të rajonit lindor të Luhanskut.

1 gusht: Anija e parë me grurë largohet nga Ukraina sipas një marrëveshje historike me Rusinë, e cila kishte bllokuar portet e Ukrainës që nga shkurti.