“Ne tashmë kemi fituar”, Trump deklaron fitoren ende pa u numëruar fletët e votimit

Me miliona vota që presin ende të numërohen, presidenti Donald Trump pohoi në mënyrë të gabuar mashtrimin e zgjedhjeve, duke u zotuar se do të kërkojë nga Gjykata e Lartë të ndërhyjë në procesin zgjedhor dhe si të mos mjaftonte kjo, bëri një pretendim të parakohshëm të fitores në një garë të ashpër që mund të duhen ditë për t'u zgjidhur.

Duke folur  me rreth 150 mbështetës brenda Dhomës Lindore të Shtëpisë së Bardhë, Trump pretendoi se ai kishte fituar disa shtete në të cilat ende janë duke u numëruar fletët e votimit si Georgia, Carolina North dhe Pennsylvania.

“Trump gabimisht e deklaroi veten fitues të zgjedhjeve dhe dëshiron që numërimi i votave të ndalet”, shkruan Washington Post.

“Për mua, ky është një moment shumë i trishtuar dhe ne do ta fitojmë këtë. Dhe për sa më përket mua, ne tashmë  fituam”, tha ai.

Sfiduesi i tij demokrat, Joe Biden, këmbënguli më herët se "ne besojmë se jemi në rrugën e duhur për të fituar këto zgjedhje" dhe u lut për durim, duke përmendur Pensilvaninë, Wisconsin dhe Michigan, ku votat ende po grumbulloheshin. "Nuk ka mbaruar derisa të numërohet çdo votë", tha Biden.

Aleatët dhe kundërshtarët e Trump kritikuan zotimin e presidentit për të sfiduar shtetet që ende numërojnë votat dhe pretendimin e rremë të presidentit se ai tashmë kishte fituar zgjedhjet.

Chris Christie, një ish-guvernator i GOP i New Jersey dhe aleat i ngushtë i Trump, tha se të gjitha votat e mbetura duhet të numërohen.

"Të gjitha këto vota duhet të numërohen, sonte nuk ishte koha për të bërë këtë argument," tha Christie në ABC News. "Nuk jam dakord me atë që bëri sonte".

Disa reporterë dhe ekspertë të Fox gjithashtu shqyrtuan pretendimin e Trump për fitore para se të numërohen të gjitha fletët e votimit të votuesve. Dana Perino e quajti atë "thellësisht të papërgjegjshme".

Ndërkohë, Guvernatori demokratik Tom Wolf i Pensilvanisë, ku këto beteja mund të zhvillohen në mënyrë më dramatike, u zotua se do të numërohej vota e çdo votuesi.

“Ne ende kemi mbi 1 milion fletë votimi për të numëruar në Pensilvani. Unë i premtova Pensilvanisë se do të numëronim çdo votë dhe kjo është ajo që do të bëjmë, ”tha Wolf.

 "Le të jemi të qartë: Ky është një sulm partizan ndaj zgjedhjeve të Pensilvanisë, votave tona dhe demokracisë. Qarqet tona po punojnë pa u lodhur për të përpunuar votat sa më shpejt dhe sa më saktë që të jetë e mundur. Pensilvania do të ketë zgjedhje të drejta dhe ne do të numërojmë çdo votë”, tha ai.