Nga 1987 deri në vitin 2025, sulmet më të mëdha që kanë tronditur Evropën

Një person i armatosur vrau të paktën 10 persona në një shkollë të mesme në qytetin jugor austriak të Gracit të martën, një nga të shtënat më të rënda në një shkollë në historinë moderne të vendit. 

Reuters sjell një kronologji të sulmeve më të këqija masive që janë kryer në 4 dekadat e fundit në Evropë.

Maj 1987, BELGJIKË- Michael Van Wijnendaele vret shtatë persona në Belgjikë, pastaj qëllon veten ndërsa policia përpiqet ta detyrojë të dorëzohet.

Gusht 1987, BRITANI- Michael Ryan, një fanatik 27-vjeçar i armëve, krijon një tragjedi në qytetin anglez Hungerford, duke vrarë 16 persona dhe duke plagosur 11 të tjerë përpara se të qëllonte veten.

Korrik 1989, FRANCË- Një fermer francez qëllon dhe vret 14 persona, përfshirë anëtarë të familjes së tij në fshatin Luxiol, pranë kufirit zviceran. Ai më pas plagoset dhe kapet nga policia.

Shtator 1995, FRANCË- Një i ri 16-vjeçar vret 15 persona dhe më pas veten me një pushkë në qytetin Cuers, pas një grindjeje me prindërit e tij.

Mars 1996, BRITANI- Thomas Hamilton futet me forcë në një shkollë fillore në qytetin skocez Dunblane dhe qëllon për vdekje 16 fëmijë dhe mësuesin e tyre përpara se të vriste veten.

Prill 2002, GJERMANI- Robert Steinhauser, 19 vjeç, hap zjarr në Erfurt pasi tha se nuk do të jepte një provim matematike. Ai vret 12 mësues, një sekretare, dy nxënës dhe një polic në gjimnazin Gutenberg, përpara se të vriste veten.

Shtator 2004, RUSI- Më shumë se 300 pengje, gjysma e tyre fëmijë vdesin në Shkollën Nr. 1 në qytetin Beslan në Osetinë e Veriut, pasi ajo pushtohet nga rebelët që kërkojnë pavarësinë çeçene dhe një fund të menjëhershëm të luftës atje.

Nëntor 2007, FINLANDË- Pekka-Eric Auvinen vret gjashtë nxënës, infermieren e shkollës, drejtorin dhe veten me një pistoletë në Shkollën e Mesme Jokela pranë Helsinkit.

Shtator 2008, FINLANDË- Studenti Matti Saari hap zjarr në një shkollë profesionale në Kauhajoki në Finlandën veriperëndimore, duke vrarë nëntë nxënës të tjerë dhe një anëtar të stafit përpara se të vriste veten.

Mars 2009, GJERMANI- Një 17-vjeçar i armatosur vret nëntë nxënës dhe tre mësues në një shkollë pranë Stuttgartit dhe një person tjetër në një klinikë aty pranë. Ai vritet më vonë në një shkëmbim zjarri me policinë. Dy kalimtarë gjithashtu vriten, duke e çuar numrin e të vdekurve në 16, përfshirë edhe personin e armatosur.

Qershor 2010, BRITANI- Derrick Bird hap zjarr ndaj njerëzve në të gjithë qarkun rural të Cumbria. 12 persona vriten dhe 11 plagosen. Bird gjithashtu vret veten.

Gusht 2010, SLLOVAKI- Një person i armatosur qëllon për vdekje gjashtë anëtarë të një familjeje rome dhe një grua tjetër në kryeqytetin sllovak Bratislavë përpara se të vriste veten. Në këtë rast plagosen edhe 14 persona të tjerë.

Prill 2011, HOLANDË- Tristan van der Vlis hap zjarr në qendrën tregtare Ridderhof në Alphen aan den Rijn, në jug të Amsterdamit, duke vrarë gjashtë persona përpara se të drejtonte armën nga vetja.

Korrik 2011, NORVEGJI- Anders Behring Breivik vret 77 persona kur vendos një makinë-bombë që vret tetë persona në një ndërtesë qeveritare të Oslos, pastaj qëllon për vdekje 69 të tjerë, shumica prej tyre adoleshentë të krahut rinor të Partisë Laburiste në pushtet.

Nëntor 2015, FRANCË- Sulmuesit islamistë në Paris, të armatosur me armë dhe bomba, synojnë sallën e muzikës Bataclan, gjashtë bare dhe restorante, dhe perimetrin e stadiumit sportiv Stade de France, pak jashtë kryeqytetit francez, duke vrarë 130 persona – përfshirë 90 pjesëmarrës në koncert në Bataclan – dhe duke plagosur qindra të tjerë.

Korrik 2016, GJERMANI- Një 18-vjeçar gjermano-iranian, i cili ishte i fiksuar pas vrasjeve masive, vret të paktën nëntë persona në Mynih.

Mars 2023, GJERMANI- Një person i armatosur në Hamburg qëllon për vdekje gjashtë persona para se të vriste veten në një sallë adhurimi të Dëshmitarëve të Jehovait. Tetë persona të tjerë u plagosën, përfshirë një grua shtatëmuajshe shtatzënë, e cila humbi vajzën e saj të palindur.

Maj 2023, SERBI- Një djalë 13-vjeçar qëllon për vdekje tetë nxënës të tjerë dhe një roje sigurie në një shkollë në Beograd. Dy ditë më vonë, një person i armatosur vret tetë persona dhe plagos 14 të tjerë në një fshat pranë kryeqytetit serb. Të dy të dyshuarit arrestohen.

Dhjetor 2023, REPUBLIKA ÇEKE- Një student çek qëllon për vdekje babanë e tij dhe më pas vret 14 persona në universitetin e tij në Pragë. Personi i armatosur, i vrarë në vendngjarje ndoshta nga një prej plumbave të tij, dyshohet gjithashtu për vrasjen e një burri tjetër dhe vajzës së tij dy-muajshe, të cilët u gjetën të qëlluar për vdekje në pyll në një fshat jashtë Pragës, një javë më parë.

Mars 2024, RUSI- Persona të armatosur hynë me forcë në sallën e koncerteve Crocus City Hall pranë Moskës duke vrarë të paktën 139 persona dhe duke plagosur 182 të tjerë. Shteti Islamik, grupi militant që dikur kërkonte kontroll mbi pjesë të mëdha të Irakut dhe Sirisë, merr përgjegjësinë për sulmin.

Korrik 2024, KROACI- Një person i armatosur hyn në një azil pleqsh në Kroacinë veriperëndimore, duke qëlluar për vdekje gjashtë persona, përfshirë nënën e tij, dhe duke plagosur pesë të tjerë.

Shkurt 2025, SUEDI- Një person i armatosur vret 11 persona, përfshirë veten, në një qendër arsimore për të rritur në Suedinë qendrore, në të shtënat masive më vdekjeprurëse në vend.

Qershor 2025, AUSTRI- Një person i armatosur hyn në një shkollë të mesme në qytetin jugor të Gracit dhe hap zjarr, duke vrarë të paktën nëntë persona dhe më pas veten.