Nga Macron tek Netanyahu dhe Zelensky/ Liderët botërorë urojnë Donald Trump, presidenti i 47-të i SHBA-ve

Donald Trump shpalli më parë fitoren si Presidenti i 47-të i SHBA-ve, në një garë të fortë përballë Kamala Harris. Trump falënderoi mbështetësit e tij amerikanë dhe deklaroi se do të realizojë çdo premtim të dhënë.

Liderët e Evropës dhe botës kanë përcjellë urimet e tyre për Trump-in. Nga presidenti francez Emmanuel Macron deri te presidenti ukrainas Volodymyr Zelensky, më poshtë janë disa nga urimet e liderëve botërorë për Trump-i.

“Kthimi më i madh në historinë politike të SHBA-ve! Urime Presidentit Donald Trump për fitoren e tij të madhe”, shkroi në rrjetet sociale, kryeministri hungarez, aleat prej kohësh i Trump, Viktor Orbán. "Një fitore shumë e nevojshme për Botën!"

“Urime për rikthimin më të madh të historisë!” shkroi kryeministri izraelit Benjamin Netanyahu në X. "Kthimi juaj historik në Shtëpinë e Bardhë ofron një fillim të ri për Amerikën dhe një riangazhim të fuqishëm ndaj aleancës së madhe midis Izraelit dhe Amerikës".

Presidenti francez Emmanuel Macron postoi në X: “Gati për të punuar së bashku siç mundëm të bënim gjatë katër viteve. Me bindjet tuaja dhe të miat. Në respekt dhe ambicie. Për më shumë paqe dhe prosperitet.”

“Në emër timin dhe të qeverisë italiane, urimet e mia më të sinqerta për Presidentin e zgjedhur të Shteteve të Bashkuara, Donald Trump”, tha kryeministrja e Italisë, Giorgia Meloni.

“Italia dhe Shtetet e Bashkuara janë kombe ‘motra’, të lidhura nga një aleancë e palëkundur, vlera të përbashkëta dhe një miqësi historike. Është një lidhje strategjike, të cilën jam e sigurt se tani do ta forcojmë edhe më shumë”, shtoi ajo.

“Unë e përgëzoj Donald Trump për suksesin zgjedhor. SHBA-të janë një partner i rëndësishëm strategjik për Austrinë”, tha kancelari austriak Karl Nehammer. “Ne presim të zgjerojmë dhe forcojmë më tej marrëdhëniet tona transatlantike së bashku në mënyrë që të përballojmë me sukses sfidat globale.”

“Urime Donald Trump për fitoren tuaj. Së bashku, ne përballemi me sfidat serioze përpara. Serbia është e përkushtuar të punojë me SHBA-në për stabilitet, rritje dhe paqe”, tha presidenti serb Aleksandar Vuçiç.

“Urime, zoti President Donald Trump! Ti e bëre të ndodhë!” tha presidenti polak Andrzej Duda.

“Urime Donald Trump për fitoren e zgjedhjeve presidenciale. Qëllimi ynë i përbashkët është të sigurojmë që marrëdhëniet midis vendeve tona të mbeten në nivelin më të lartë, pavarësisht ndryshimeve në administratë, dhe që ne të vazhdojmë t'i zhvillojmë ato për të mirën e qytetarëve tanë, "tha kryeministri çek Petr Fiala.

“Ai e ka bërë sërish. Rikthimi më i jashtëzakonshëm politik i jetës sonë”, shkroi deputeti britanik dhe udhëheqësi i reformës në Mbretërinë e Bashkuar, Nigel Farage.

Në një deklaratë në mediat sociale, presidenti ukrainas Volodymyr Zelenskyy kujtoi "takimin e tij të madh" me Trump në shtator dhe vlerësoi "angazhimin e tij ndaj qasjes "paqe përmes forcës" në çështjet globale.

“Ne mbështetemi në mbështetjen e vazhdueshme dypartiake për Ukrainën në Shtetet e Bashkuara,” shtoi Zelenskyy.