Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

Bota

OKB: Talibanët po arrestojnë burra për shkak të modelit të flokëve dhe mosfaljes

Politiko 10 Prill 2025, 18:51

OKB: Talibanët po arrestojnë burra për shkak të modelit

“Policia e moralit” në Afganistan ka arrestuar burra dhe berberët e tyre për shkak të modelit të flokëve dhe po ashtu ka arrestuar burra të tjerë pasi nuk kanë shkuar në xhami që të falen gjatë muajit të Ramazanit. Kështu u tha në një raport të Kombeve të Bashkuara të publikuar më 10 prill, gjashtë muaj pasi hynë në fuqi ligjet që rregullojnë sjelljen e njerëzve në Afganistan.

Ministria për Parandalimin e Vesit dhe Promovimin e Virtytit në Afganistan publikoi ligjet e reja gushtin e vitit të kaluar. Legjislacioni mbulon shumë aspekte të jetës së përditshme në Afganistan, përfshirë transportin publik, muzikën, shkurtimin e mjekrës dhe festimet. Ndër ligjet e miratuara nga kjo ministri është edhe ndalesa për zërat dhe fytyrat e pambuluara të grave në publik.

Po atë muaj, një zyrtar i lartë i OKB-së paralajmëroi se ligjet përfaqësojnë “një pamje shqetësuese” për të ardhmen e vendit, pasi ato iu shtohen kufizimeve ekzistuese për gratë dhe vajzat sa i përket punësimit, arsimimit dhe për kodin e veshjes. Talibanët i kanë hedhur poshtë shqetësimet e OKB-së lidhur me ligjet për moralin.

Në raportin e së enjtes, të misionit të OKB-së në Afganistan, u tha se në gjashtë muajt e parë të zbatimit të këtyre ligjeve, mbi gjysma e arrestimeve kishin të bënin “ose me burra që nuk e kishin gjatësinë e mjekrës apo modelin e flokëve në përputhje me rregullat, ose me berberë që ofronin shkurtime të mjekrës apo prerje të flokëve që nuk përputheshin me rregullat”.

Raporti po ashtu tha se “policia e moralit” rregullisht arreston njerëz “pa iu nënshtruar një procesi të rregullt apo pa respektuar mbrojtjet ligjore”. Gjatë muajit të Ramazanit, pjesëmarrja e obliguar në lutje e burrave është monitoruar nga afër dhe shpesh kjo ka çuar në arrestime të atyre që nuk kanë marrë pjesë në lutje, u tha në raport.

Misioni i OKB-së tha se dy gjinitë janë prekur në mënyrë negative nga ligjet, veçmas personat që kanë biznese të vogla sikurse qendrat private të edukimit, berberët dhe floktaret, rrobaqepësit, bizneset që ofrojnë shërbime për dasmat dhe restorantet. Kjo ka çuar në ulje apo humbje të plotë të të ardhurave dhe mundësive për punësim.

Sipas raportit, ndikimet e drejtpërdrejta dhe të tërthorta socio-ekonomike nga zbatimi i ligjeve ka të ngjarë të përkeqësojnë edhe më shumë situatën e rëndë ekonomike në Afganistan. Një studim i Bankës Botërore ka vlerësuar se ndalimi i grave për të studiuar dhe punuar mund t’i kushtojë shtetit 1.4 miliard dollarë në vit. Sipas raportit të OKB-së, më shumë se 3.300 inspektorë janë të angazhuar për t’i informuar njerëzit për ligjet dhe zbatimin e tyre./REL