Paralajmëron udhëheqësi iranian: Do ta sulmojmë sërish Izraelin nëse është e nevojshme

Sulmet raketore të Iranit ndaj Izraelit ishin korrekte, logjike dhe të ligjshme”, deklaroi Ayatollah Ali Khamenei para një turme të madhe që ishte mbledhur për ta dëgjuar atë të fliste në Teheran.

Udhëheqësi i Iranit Ayatollah Ali Khamenei e përshkroi sulmin ndaj Izraelit si “dënim minimal” për ato që ai i quajti “krimet e habitshme” të Izraelit ndërsa kryente lutjet e së Premtes në kryeqytet para një turme të madhe që ishte mbledhur për ta dëgjuar atë të fliste në Teheran.

Udhëheqësi suprem mbajti një pjesë të fjalimit të tij në arabisht për t’iu drejtuar mbështetësve palestinezë dhe libanezë.

Gjatë fjalimit të tij, Khamenei vlerësoi Nasrallahun dhe shprehu mbështetje për Hamasin dhe Hezbollahun, të cilat ai tha se ofronin “shërbim jetik për të gjithë rajonin dhe mbarë botën islame”, shkruan BBC. 

Khamenei gjithashtu i tha turmës se Irani do të hakmerrej nëse, siç pritej, Izraeli nis një përgjigje ndaj sulmit raketor të së martës.

“Irani do ta sulmojë përsëri Izraelin nëse është e nevojshme”, tha lideri iranian. 

Ai tha se grupet e armatosura të lidhura me Iranin “nuk do të tërhiqen” në konfliktin e tyre me Izraelin, i cili hyri në një fazë të re pasi Hamasi filloi sulmet vdekjeprurëse në Izrael pothuajse një vit më parë.

Siç raportohet, Irani është mbështetësi kryesor i Hezbollahut dhe Hamasit, si dhe grupeve të tjera të armatosura në Lindjen e Mesme që kanë sulmuar Izraelin.

Javët e fundit, disa liderë të lartë të grupeve të mbështetura nga Irani dhe krahut të fuqishëm ushtarak të Iranit, Gardës Revolucionare, janë vrarë në sulmet izraelite ose vrasje të supozuara izraelite.

Bëhet e ditur se fjalimi i Khameneit erdhi tre ditë pasi Irani gjuajti gati 200 raketa në Izrael, në atë që tha se ishte hakmarrje për vrasjen e liderit të Hezbollahut, Hassan Nasrallah.