Reagon Kremlini: Bisedimet midis Putin dhe të dërguarit të SHBA-së ishin “të dobishme dhe konstruktive”

Kremlini thotë se i dërguari i SHBA-së Steve Witkoff dhe Vladimir Putin i Rusisë kanë zhvilluar bisedime “konstruktive”, ndërsa afati i fundit i Donald Trump që Moska të bjerë dakord për një armëpushim në Ukrainë po afron, shkruan BBC. 

Ndihmësi i politikës së jashtme Yuri Ushakov tha se, gjatë takimit të tyre tre-orësh, Putin i transmetoi “sinjale” Witkoff-it mbi atë që ai e quajti “çështja ukrainase” dhe “mori sinjale përkatëse” nga pala amerikane.

Më shumë rreth negociatave do të ndahet pasi Witkoff t’i raportojë Trump-it, shtoi Ushakov.

Presidenti i SHBA-së ka thënë se Rusia mund të përballet me sanksione të rënda ose të shohë sanksione dytësore të vendosura kundër të gjithë atyre që tregtojnë me të nëse nuk ndërmerr hapa për t’i dhënë fund “luftës së tmerrshme” me Ukrainën.

Nuk pati asnjë koment të menjëhershëm nga SHBA-të ose Ukraina pas bisedimeve.

Përpara tyre, Volodymyr Zelensky, presidenti i Ukrainës, paralajmëroi se Rusia do të bënte hapa seriozë drejt paqes vetëm nëse do të fillonte të mbaronte paratë. Ai mirëpriti kërcënimin e sanksioneve dhe tarifave më të ashpra të SHBA-së për vendet që blejnë naftë ruse.

Në imazhet e shpërndara nga mediat ruse, të dy burrat - të cilët janë takuar disa herë më parë - u panë duke buzëqeshur dhe duke shtrënguar duart .

Pritjet janë të zbehta për një zgjidhje deri të premten, dhe Rusia ka vazhduar sulmet e saj ajrore në shkallë të gjerë ndaj Ukrainës pavarësisht kërcënimeve të Trump për sanksione.

Para se të merrte detyrën në janar, Trump pretendoi se do të ishte në gjendje t'i jepte fund luftës midis Rusisë dhe Ukrainës brenda një dite. Ai dështoi dhe që atëherë është bërë i paduruar për mungesën e përparimit të prekshëm, me retorikën e tij ndaj Rusisë që ashpërsohet.

"Ne menduam se e kishim zgjidhur [luftën] disa herë, dhe pastaj Presidenti Putin del dhe fillon të lëshojë raketa në ndonjë qytet si Kievi dhe vret shumë njerëz në një azil pleqsh apo çfarëdo qoftë," tha ai muajin e kaluar.

Tre raunde bisedimesh midis Ukrainës dhe Rusisë në Stamboll nuk kanë arritur përfundojnë luften, tre vjet e gjysmë pasi Moska nisi pushtimin e saj të plotë.

Parakushtet ushtarake dhe politike të Moskës për paqe mbeten të papranueshme për Kievin dhe partnerët e saj perëndimorë. Kremlini gjithashtu ka refuzuar vazhdimisht kërkesat e Kievit për një takim midis Zelensky dhe Putin.

Ndërkohë, administrata amerikane miratoi 200 milionë dollarë (150 milionë paund) shitje shtesë ushtarake për Ukrainën të martën pas një telefonate midis Zelensky dhe Trump, në të cilën të dy udhëheqësit diskutuan gjithashtu bashkëpunimin në mbrojtje dhe prodhimin e dronëve.

Ukraina ka përdorur dronë për të goditur rafineritë dhe objektet energjetike të Rusisë, ndërsa Moska i ka përqendruar sulmet e saj ajrore në qytetet e Ukrainës.