Përmirësimi i raporteve me Rusinë, liderët e BE-së nuk bien dakord me qëndrimin e Francës dhe Gjermanisë

Vendet anëtare të Bashkimit Evropian kanë mosmarrëveshje rreth mënyrës se si duhet t'i rregullojnë marrëdhëniet me Rusinë, ndërsa 27 udhëheqësit e bllokut takohen në Bruksel.

Qeveritë franceze dhe gjermane duan të rinisin takimet e samitit me Vladimir Putin, por vendet e tjera të BE nuk pajtohen me këtë strategji dhe duan një linjë më të ashpër ndaj Moskës.

Dy vendet më të mëdha të Evropës e shohin këtë model dialogu, si rrugën për tu afruar me Rusinë.

"Nuk është e mjaftueshme që presidenti amerikan flet me presidentin rus. Bashkimi Evropian duhet gjithashtu të krijojë formate të ndryshme diskutimi [me Moskën]," tha Angela Merkel të enjten.

"Konfliktet mund të zgjidhen më mirë, siç kemi parë me Presidentin e SHBA, kur njerëzit flasin me njëri-tjetrin," shtoi ajo më vonë gjatë mbërritjes në Bruksel.

Presidenti francez Emmanuel Macron gjithashtu tha se dialogu është i nevojshëm për "stabilitetin e kontinentit evropian", duke vënë në dukje se ata nuk do të heqin dorë nga asnjë prej "vlerave" ose "interesave" të tyre në proces.

Qasja e Francës dhe Gjermanisë është pritur mirë nga Kremlini, pasi zëdhënësi i Putinit e përshkruan atë si "pozitive".

Por shtetet balltike, Polonia, Suedia dhe Hollanda kanë kundërshtuar me forcë për të rifilluar dialogun me udhëheqësin rus dhe gjithashtu ndjehen të zhgënjyera nga Parisi dhe Berlini, pasi të dy vendet befasuan me propozimin e tyre të ri mbi marrëdhëniet me Rusinë gjatë takimeve përgatitore në Bruksel.

Grupi i vendeve anëtare thotë se Moska po rrit veprimet agresive kundër vendeve të BE dhe se tani nuk është koha për dialog. Kryeministri Hollandez Mark Rutte tha të enjten se një takim midis presidentëve të institucioneve të BE dhe Putin nuk do ta "shqetësonte" atë, ndërsa  shtoi se ai vetë, si një anëtar i Këshillit Evropian, nuk do të merrte pjesë në asnjë takim me kryeministrin shumëvjeçar rus.

Krišjānis Kariņš, Kryeministri i Letonisë, u tha gazetarëve në Bruksel se që të ndodhte një takim i tillë, Moska së pari duhet të tregojë një mirëbesim.

"Shqetësimi që kam si kryeministër i Letonisë është se nëse duam të hapim dialogun si liderë evropianë me Rusinë, na duhen hapa të caktuar që vijnë gjithashtu nga drejtimi rus", u shpreh ai.

Vetëm javën e kaluar, Polonia u godit nga një sulm kibernetik në shkallë të gjerë, i cili thotë se e ka origjinën në Rusi, duke e shtuar këtë ngjarje në listën e gjatë të arsyeve të Varshavës për të mos filluar përsëri bashkëpunimin me Moskën.

Duke iu referuar këtij sulmi, kryeministri i Polonisë Mateusz Moraëiecki tha se lloji i dialogut i propozuar nga Franca dhe Gjermania do të ishte i mundur vetëm nëse Rusia do të ndalonte "politikën e saj agresive".

"Fillimi i çdo dialogu të drejtpërdrejtë në nivelin më të lartë politik është i mundur vetëm në një situatë, ku ka një de-përshkallëzim aktual dhe tërheqje aktuale nga politika agresive," tha Moraëiecki.  

Parisi dhe Berlini thonë se bashkëpunimi është i mundur me Moskën. Ndryshimi i klimës, energjia, shëndeti, lufta kundër terrorizmit dhe krimit të organizuar, janë evidentuar si pika ku BE dhe Rusia mund të punojnë së bashku.

Sipas një diplomati të lartë të BE, Belgjika dhe Danimarka thonë se propozimi ka ardhur shumë vonë dhe se një marrëveshje mbi këtë çështje, nuk duhet të pritet në samitin e së enjtes.

Burimi: Euronews