Rrjeti Sirian për të Drejtat e Njeriut: Mbi 112 mijë persona rezultojnë ende të zhdukur

Sipas Rrjetit Sirian për të Drejtat e Njeriut (SNHR), më shumë se 112 mijë sirianë të zhdukur me forcë nën regjimin Baath mbeten të pagjetur, me prova që sugjerojnë se shumë prej tyre u vranë në paraburgim.

Shkalla e torturave dhe ekzekutimeve jashtëgjyqësore në burgjet siriane është zbuluar gjithnjë e më shumë pas rënies së regjimit 61-vjeçar të Partisë Baath më 8 dhjetor.

Baza e të dhënave e SNHR përfshin të dhënat e rreth 136 mijë individëve që u arrestuan ose u zhdukën me forcë gjatë regjimit Baath. Organizata ka dokumentuar lirimin e rreth 24.200 të burgosurve nga objektet e paraburgimit në të gjithë Sirinë që nga rënia e regjimit.

Kryetari i SNHR-së, Fadel Abdul Ghany, tha për Anadolu se grupi aktualisht po verifikon detajet e të liruarve nga burgjet në Halep më 28 nëntor, Hama më 5 dhjetor, Homs më 7 dhjetor dhe në Damask më 8 dhjetor.

Abdul Ghany theksoi se pas përjashtimit të të liruarve të fundit, 112.414 individë të arrestuar regjimi mbeten të pagjetur dhe me shumë gjasa janë vrarë.

“Meqenëse trupat e tyre nuk u janë kthyer familjeve të tyre, ata ende kategorizohen si të zhdukur me forcë. Nuk ka asnjë provë që sugjeron se ata janë ende gjallë”, tha Ghany.

 

Regjimi i Asadit vonoi me qëllim regjimin e të dhënave të vdekjeve

Ghany tha se regjimi i Bashar Asadit vonoi regjistrimin e vdekjeve në regjistrat e civilëve, me qëllimin për të zgjatur ankthin e familjeve.

Ai theksoi se njerëzit e vrarë nga regjimi i Partisë Baath shpesh kishin dy data të regjistruara në regjistër, respektivisht datën aktuale të vdekjes së tyre dhe datën e vonuar të regjistrimit të tij, ndonjëherë me vite jo të njëjta.

“Ata u vranë dhe u regjistruan pa njoftuar familjet e tyre, duke i lënë familjet të përjetojnë vuajtje të vazhdueshme në pritje të lajmeve ose të zbulimit të varreve masive”, tha Ghany, duke shtuar se regjimi e përdori këtë taktikë për të dhënë shpresa të rreme.

– Varret masive

Më tej, Ghany theksoi se dhjetëra varre masive mbeten të pazbuluara në të gjithë Sirinë.

“Vetëm disa varre masive janë zbuluar dhe ka zëra për shumë të tjera”, tha ai.

Ai theksoi se identifikimi i trupave dhe krahasimi i tyre me mostrat e familjeve të të zhdukurve është një proces shumë kompleks, duke shtuar se vetëm kur të identifikohen trupat mund të konfirmohet fati i të zhdukurve me forcë.

Ai gjithashtu paralajmëroi kundër nxitjes së shpresës së rreme midis familjeve në lidhje me thashethemet për burgje sekrete të nëndheshme.

Ai tha se të gjitha burgjet e regjimit u hapën pas datës 8 dhjetor dhe se në këto ambiente nuk ka mbetur njeri dhe as burgje sekrete.

E themeluar në qershor të vitit 2011 për të dokumentuar shkeljet sistematike të të drejtave të njeriut në Siri, SNHR-ja vazhdon përpjekjet e saj nën udhëheqjen e Ghany-t derisa mijëra familje presin lajmet për të dashurit e tyre të zhdukur.