Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

Bota

Shefi i ushtrisë izraelite jep dorëheqjen për shkak të sulmit të 7 tetorit: Dështova në mbrojtjen e shtetit

Politiko 21 Janar 2025, 16:00

Shefi i ushtrisë izraelite jep dorëheqjen për shkak të

Shefi i Shtabit të Përgjithshëm të Ushtrisë së Izraelit, Herzi Halevi, njoftoi të martën se ka dorëzuar dorëheqjen nga detyra, duke e marrë përgjegjësinë për sulmin vdekjeprurës të Hamasit më 7 tetor 2023 në Izrael. Ndërkohë, ushtria izraelite e kreu një operacion të madh ushtarak në Bregun e okupuar Perëndimor të martën, duke i vrarë gjashtë njerëz dhe duke i plagosur 35 të tjerë, sipas Ministrisë palestineze së Shëndetësisë. Halevi, i cili e mori detyrën në janar 2023, tha se dorëheqja e tij do të hyjë në fuqi më 6 mars.

Gjenerallejtënant Halevi është zyrtari më i lartë izraelit që jep dorëheqje për shkak të dështimit të sigurisë më 7 tetor 2023, kur mijëra militantë të udhëhequr nga Hamasi – grupi palestinez i shpallur terrorist nga SHBA dhe BE – u futën në jug të Izraelit dhe sulmuan komunitetet pranë kufirit dhe bazat ushtarake. Në atë sulm u vranë 1.200 njerëz – kryesisht civilë – dhe u rrëmbyen 250 të tjerë. Më shumë se 90 pengje janë duke u mbajtur ende në Gazë, dhe besohet se rreth një e treta e tyre kanë vdekur tashmë.

Në letrën e tij të dorëheqjes, Halevi tha se ushtria, nën udhëheqjen e tij, “dështoi në detyrën e saj për ta mbrojtur shtetin e Izraelit”. Më herët, Izraeli njoftoi se po kryente “operacion të madh dhe të gjerë ushtarak” kundër militantëve palestinezë në Xhenin.

Në këtë qytet kanë ndodhur shpesh luftime mes ushtrisë izraelite dhe militantëve në vitet e fundit, madje edhe para sulmit të Hamasit më 7 tetor, që e nxiti luftën në Gazë. Lufta në Gazë ka shkaktuar viktima të shumta dhe dëme të mëdha materiale. Si pasojë e ofensivës izraelite janë vrarë më shumë se 46.000 palestinezë.

Operacioni i së martës ndodhi pak ditë pasi një armëpushim i brishtë mes Hamasit dhe Izraelit në Gazë hyri në fuqi në fundjavë. Izraeli i pushtoi Bregun Perëndimor, së bashku me Gazën dhe Jerusalemin Lindor gjatë Luftës të Lindjes së Mesme më 1967. Palestinezët duan që këto tri territore të jenë pjesë e shtetit të tyre në të ardhmen.

Armëpushimi nuk vlen për Bregun Perëndimor, ku dhuna është rritur shumë që nga fillimi i luftës. Ushtria izraelite ka kryer operacione në Bregun Perëndimor pothuajse çdo ditë, të cilat shpesh kanë nxitur luftime. Ka pasur edhe rritje të sulmeve të ekstremistëve hebraikë ndaj palestinezëve gjatë kësaj kohe, si dhe sulme të palestinezëve ndaj izraelitëve./REL