Si filloi grindja midis Donald Trump dhe Elon Musk?

Pasi krijuan një marrëdhënie të ngushtë politike, dy miliarderët sollën ndryshime të rëndësishme në Uashington. Tani aleanca e tyre është në kolaps.

Më pak se një javë pasi lavdëruan njëri-tjetrin në Zyrën Ovale, Presidenti i SHBA-së Donald Trump dhe Elon Musk, njeriu më i pasur në botë, u grindën në mënyrë spektakolare dhe publikisht.

Në një luftë fjalësh që u përshkallëzua të enjten, të dy burrat përdorën platformën e tyre të mediave sociale për të sulmuar njëri-tjetrin.

Edhe pse shumë analistë politikë kishin parashikuar se aleanca e tyre nuk do të zgjaste, shpejtësia me të cilën ajo u shemb, ishte gjithsesi dramatike.

Vetëm të premten e kaluar, Trump po festonte punën e Musk si kreu i Departamentit të Efikasitetit të Qeverisë (DOGE), i cili mbikëqyr shkurtimin e miliarda dollarëve në shpenzimet federale.

Miliarderi i lindur në Afrikën e Jugut kishte vendosur të tërhiqej nga puna e tij me qeverinë amerikane për t'u përqendruar në bizneset e tij, të cilat kanë vuajtur si rezultat i hyrjes së tij në politikë.

Duke folur në ceremoninë e lamtumirës në Shtëpinë e Bardhë të premten e kaluar, presidenti amerikan e quajti Musk-un, “një nga udhëheqësit dhe inovatorët më të mëdhenj të biznesit që bota ka prodhuar ndonjëherë”.

 “Ai bëri një hap përpara për të vënë talentin e tij shumë të madh në shërbim të kombit tone, dhe ne e vlerësojmë këtë”, tha Trump.

“Dua vetëm të them se Eloni ka punuar pa u lodhur, duke ndihmuar në udhëheqjen e programit më gjithëpërfshirës dhe më të rëndësishëm të reformës qeveritare ndër breza”, shtoi ai.

Në përgjigje, Musk, të cilit iu dhurua një çelës i artë me emblemën e Shtëpisë së Bardhë, tha se do të vazhdonte ta vizitonte Trumpin, si “një mik dhe këshilltar”.

Duke parë përreth dhomës dekorimet e reja të arta të Trump, sipërmarrësi tha: “Zyra Ovale më në fund ka madhështinë që meriton falë presidentit.”

Por shkëlqimi i marrëdhënies së tyre të ngushtë, që dikur ishte, tani është zhdukur plotësisht.

Pasi miqësia e miliarderëve u acarua këtë javë dhe mosmarrëveshja e tyre u thellua, janë ngritur pyetje në lidhje me dëmin që dy nga burrat më të fuqishëm në botë, mund t’i shkaktojnë njëri-tjetrit.

Ndërsa Musk mund të mbajë dhjetëra miliona dollarë nga donacionet e premtuara të fushatës, Trump ka kërcënuar të shkurtojë miliarda dollarë në kontratat dhe subvencionet qeveritare për kompanitë e Musk.

'Faturë e madhe dhe e shëmtuar'

Përçarja publike midis dy burrave filloi të hapej të martën, kur Musk kritikoi në X "projektligjin e madh dhe të bukur" të Trump.

Projektligji, i cili u miratua me një diferencë të ngushtë votash në Dhomën e Përfaqësuesve muajin e kaluar, por përballet me sfida në Senat, përfshin shkurtime të mëdha taksash dhe rritjen e tavanit të borxhit kombëtar.

Musk, i cili thotë se projektligji dëmton të gjitha kursimet e bëra nga DOGE, filloi ta dënojë atë me forcë këtë javë.

Projektligji është "masiv, skandaloz, plot me mish derri" dhe e "neveritshme ", tha Musk.

Drejtori ekzekutiv i Teslës kritikoi ashpër gjithashtu republikanët e Dhomës së Përfaqësuesve për votimin, për atë që ai e quan "projektligjin e madh dhe të shëmtuar", i cili sipas tij do ta rrisë deficitin e SHBA-së në 2.5 trilionë dollarë (2.19 trilionë euro).

Përshkallëzimi i mosmarrëveshjes

Pavarësisht forcës së gjuhës së Musk, vetëm të enjten grindja midis tij dhe Trump u përshkallëzua plotësisht.

Të enjten në mëngjes, Musk ripostoi disa postime të vjetra të Trump në rrjetet sociale, përfshirë një në të cilin presidenti tani i SHBA-së tha se “asnjë anëtar i Kongresit nuk duhet të jetë i kualifikuar për rizgjedhje”, nëse buxheti i vendit nuk është i balancuar.

“Nuk mund të pajtohesha më shumë”, shkroi Musk, në kritika të drejtpërdrejta ndaj projektligjit gjithëpërfshirës të taksave dhe shpenzimeve të Trump.

Rreth mesditës së të enjtes, Trump u përgjigj në Zyrën Ovale gjatë një vizite nga kancelari gjerman Friedrich Merz..

Trump tha se ishte “shumë i zhgënjyer” nga Musk, përpara se të shprehte dyshime, nëse “marrëdhënia e tyre e shkëlqyer” do të vazhdonte.

Debati më pas u bë më personal, me Musk, i cili i dha fushatës së Trump qindra miliona dollarë vitin e kaluar, duke thënë se presidenti amerikan nuk do të ishte në Shtëpinë e Bardhë pa të.

“Pa mua, Trump do t’i kishte humbur zgjedhjet, demokratët do të kontrollonin Dhomën e Përfaqësuesve dhe republikanët do të ishin 51-49 në Senat”, shkroi Musk në X.

«Një mosmirënjohje e tillë», përfundoi ai.

Gjërat arritën kulmin më vonë të enjten pasdite.

“Mënyra më e lehtë për të kursyer para në buxhetin tonë, miliarda e miliarda dollarë, është të ndërpresim subvencionet dhe kontratat qeveritare të Elonit”, shkroi Trump në platformën e tij Truth Social.

"Gjithmonë jam habitur që Biden nuk e bëri këtë!" shtoi ai.

Musk u hakmor, duke pretenduar se emri i Trump shfaqet në dosjet e pedofilit dhe financierit të turpëruar Jeffrey Epstein, duke pretenduar se kjo ishte "arsyeja e vërtetë pse ato nuk janë bërë publike".

Shtëpia e Bardhë tha të enjten në mbrëmje se pretendimi i Musk për Epstein, ishte një “episodë e pafat”.

Administrata Trump ka sugjeruar se kritikat e miliarderit të teknologjisë për projektligjin historic, rrjedhin nga zhgënjimi i tij që ai nuk përmban politika të favorshme për të, diçka që Musk e ka mohuar.

Deri të enjten në mbrëmje, dukej se Musk ishte i hapur për të çtensionuar situatën.

Pasi Bill Ackman, një aleat i Trump dhe miliarder i fondeve spekulative, shkroi se të dy burrat “duhet të bëjnë paqe për të mirën e vendit tonë të madh”, Musk u përgjigj se “nuk kishte gabuar”./ Euronews.