Sistemi bankar në Afganistan afër kolapsit, perëndimi ngrin fondet

Sistemi bankar i Afganistanit është afër kolapsit, tha shefi i një prej bankave më të mëdha të shtetit për BBC.

Syed Moosa Kaleem Al-Falahi tha se industria financiare e vendit është pranë një "krize ekzistenciale" ndërsa klientët janë në panik.

"Ka tërheqje të mëdha që po ndodhin për momentin", tha ai, duke folur nga Dubai, ku ai është vendosur përkohësisht për shkak të kaosit në Kabul.

Ekonomia e Afganistanit ishte tashmë në terren të lëkundur edhe para se talebanët të merrnin kontrollin në gusht.

Ajo është jashtëzakonisht e varur nga ndihma e huaj - rreth 40% e prodhimit të saj bruto vendor (PBB) vjen nga ndihma ndërkombëtare, sipas Bankës Botërore.

Por që nga marrja nën kontroll e talebanëve, perëndimi ka ngrirë fondet ndërkombëtare, përfshirë asetet që Afganistani mund të ketë pasur me Bankën Botërore dhe Fondin Monetar Ndërkombëtar (FMN).

Zoti Al Falahi thotë se kjo po inkurajon talebanët të kërkojnë burime të tjera të mbështetjes financiare.

Kina ka premtuar 31 milionë dollarë ndihmë, përfshirë furnizimet me ushqim dhe vaksinat kundër koronavirusit.

Megjithatë, talebanët janë nën presion për të rregulluar problemet ekonomike të Afganistanit tani.

Programi Botëror i Ushqimit i Kombeve të Bashkuara ka paralajmëruar se vetëm 5% e familjeve në Afganistan kanë ushqim të mjaftueshëm çdo ditë.

Por vende si SHBA kanë thënë se ndërsa ata janë të gatshëm të marrin në konsideratë punën me talebanët - kjo do të varet nga disa parakushte - përfshirë trajtimin e regjimit ndaj grave dhe pakicave.