Sot zgjedhjet parlamentare në Slloveni, pse janë cilësuar si të rëndësishme për të ardhmen e vendit

Në Slloveni po mbahen sot zgjedhjet parlamentare që pritet të jenë një garë e ngushtë midis partisë populiste të krahut të djathtë të kryeministrit Janez Jansa dhe të gjelbër-liberalëve të opozitës në vendin e ndarë politikisht të Bashkimit Evropian.

Vendvotimet u hapën në orën 07.00 dhe do të mbyllen në 19:00 dhe shumë shpejt pritet të publikohen exit poll-et.

Rreth 1.7 milionë votues janë regjistruar për të zgjedhur përfaqësuesit e tyre nga një mori kandidatësh që konkurrojnë për vende në legjislaturën me 90 anëtarë. Partia Demokratike Sllovene konservatore në pushtet dhe Lëvizja e Lirisë e sapoformuar kanë udhëhequr sondazhet përpara votimit.

Sondazhet, megjithatë, kanë treguar se nuk mund të kishte një fitues të qartë, duke çuar në formimin e një qeverie koalicioni pas votimit, të përbërë nga të paktën tre ose katër parti.

"Sot është një ditë e rëndësishme pasi këto zgjedhje vendosin se si do të zhvillohet Sllovenia jo vetëm në katër vitet e ardhshme, por në dekadën e ardhshme," tha Jansa, pasi votoi.

Jansa u bë kryeministër pak më shumë se dy vjet më parë pasi kryeministri i mëparshëm liberal Marjan Sarec dha dorëheqjen.

Një admirues i ish-presidentit amerikan Donald Trump, Jansa e ka shtyrë vendin në të djathtë që kur mori pushtetin në fillim të pandemisë COVID-19.

Të dy blloqet parashikohet të fitojnë një numër pothuajse të barabartë votash – afërsisht 20-25 përqind – që do të thotë se përbërja dhe kursi i qeverisë së ardhshme mund të varet nga grupet më të vogla që kalojnë pragun zgjedhor prej 4 përqind.

SDS e Janshës fitoi shumicën e votave në zgjedhjet katër vjet më parë, por fillimisht nuk mundi të gjente partnerë për një qeveri koalicioni. Ai mori detyrën pasi ligjvënësit nga grupet e qendrës dhe të majtë ndryshuan anën pas dorëheqjes së Sarecit në 2020.

Jansa që atëherë është përballur me akuza për rrëshqitje drejt sundimit autoritar në stilin e aleatit të tij, kryeministrit hungarez Viktor Orban.

Ai u vu nën vëzhgimin e BE-së mes raporteve se u bëri presion kundërshtarëve dhe mediave publike dhe instaloi besnikë në pozicione kyçe për kontrollin mbi institucionet shtetërore.

Liberalët i kanë përshkruar zgjedhjet e së dielës si një referendum për të ardhmen e Sllovenisë. Ata argumentojnë se Jansa, nëse rizgjidhet, do ta shtyjë kombin tradicionalisht të moderuar më larg nga vlerat "thelbësore" demokratike të BE-së dhe drejt regjimeve të tjera populiste.

Burimi: AL Jazzera