Tragjedi në Turqi, të paktën 28 viktima nga shpërthimi në një minierë qymyri

Të paktën 28 persona kanë vdekur dhe dhjetëra mbeten të bllokuar nën tokë pas një shpërthimi në një minierë qymyri në provincën Bartin të Turqisë veriore.

Rreth 110 persona ishin në minierë në kohën e shpërthimit të premten, pothuajse gjysma e tyre në mbi 300 metra thellësi, shkruan BBC.

Ministri i Shëndetësisë i Turqisë Fahrettin Koca tha se 11 persona ishin shpëtuar dhe po trajtoheshin në spital.

Ekuipazhet e urgjencës punuan gjatë natës, duke gërmuar nëpër rrënoja në përpjekje për të shpëtuar më shumë të mbijetuar.

Rreth 49 njerëz po punonin në zonën e "rrezikshme" midis 300 dhe 350 metra (985 deri në 1,150 këmbë) nën tokë, tha Ministri i Brendshëm Suleyman Soylu.

"Ka nga ata që ne nuk ishim në gjendje t'i evakuonim nga ajo zonë," u tha Soylu gazetarëve në vendngjarje.

Ende nuk dihet shkaku i shpërthimit, ndërsa prokuroria vendase ka nisur hetimet.

Ka pasur shembje të pjesshme brenda minierës, tha ai, duke shtuar se nuk kishte shpërthime të vazhdueshme dhe se ventilimi po funksiononte siç duhet.

Presidenti turk Rexhep Tajip Erdogan pritet të vizitojë vendin të shtunën.

Kryetari i bashkisë së Amasra Recai Cakir tha se shumë nga ata që mbijetuan kishin pësuar "lëndime të rënda".

Një punëtor që arriti të shpëtonte vetë tha: "Kishte pluhur dhe tym dhe nuk e dimë saktësisht se çfarë ndodhi".

Miniera i përket ndërmarrjeve shtetërore turke të qymyrit të fortë.

Turqia dëshmoi fatkeqësinë e saj më vdekjeprurëse të minierave të qymyrit në vitin 2014, kur 301 njerëz vdiqën pas një shpërthimi në qytetin perëndimor të Soma.