Trazirat e Kapitolit, refuzohet kërkesa e Trump për të mbajtur sekret të dhënat

Një gjykatës amerikan ka vendosur që një komitet i Kongresit që heton trazirat e Kapitolit mund të ketë akses në disa nga të dhënat e Shtëpisë së Bardhë të ish-Presidentit Donald Trump.

Trump kishte kërkuar të përdorte privilegjin ekzekutiv, sipas të cilit dokumentet presidenciale mund të mbahen sekret. Hetimi po përpiqet të zbulojë nëse Trump kishte njohuri paraprake për trazirat.

Mbështetësit e Trump sulmuan ndërtesën e Kapitolit më 6 janar, ndërsa Kongresi po vërtetonte fitoren zgjedhore të Presidentit Joe Biden.

Trump ka refuzuar të pranojë humbjen e zgjedhjeve vitin e kaluar, duke pretenduar - pa prova - se ato ishin manipuluar.

Hetimi po kryhet nga një komitet i ngritur nga Dhoma e Përfaqësuesve, i cili dominohet nga demokratët e Presidentit Biden.

Paneli dëshiron të shohë një grumbull të dhënash telefonike, regjistrat e vizitorëve dhe dokumente të tjera të Shtëpisë së Bardhë që mund të hedhin dritë mbi ngjarjet që çuan në sulmin ndaj Kongresit.

Trump kishte argumentuar se komunikimet e tij në Shtëpinë e Bardhë ishin të mbrojtura dhe si të tilla nuk duhet të publikoheshin.

Por gjykatësja e qarkut të SHBA, Tanya Chutkan vendosi që Arkivi Kombëtar, agjencia federale që mban të dhënat, duhet të përmbushë kërkesën e panelit.

Në një vendim prej 39 faqesh, gjyqtari Chutkan se Kongresi kishte të drejtën të shikonte dokumentet, veçanërisht pasi presidenti aktual kishte rënë dakord.

Si një ish-president, zoti Trump gëzonte të drejtën e privilegjit ekzekutiv, shtoi ajo, por presidenti aktual "është i vendosur më së miri për të mbrojtur interesat e degës ekzekutive".

Megjithatë, nuk ka gjasa që të dhënat të jenë të aksesueshme në të ardhmen e afërt. Beteja ligjore ka të ngjarë të përfundojë në Gjykatën e Lartë.

Burimi: BBC