Flash News

Starton sot Giro D’Italia, ja akset rrugore që bllokohen në Tiranë nga ora 13:00-18:00

Kush është Papa i ri?

Papa Leo i XIV përshëndet për herë të parë besimtarët në sheshin e Shën Pjetrit

Tym i bardhë nga Vatikani: Është zgjedhur Papa i ri

"Liria funksionon", PD përshëndet qëndrimin e DASH: E drejta vonoi, por u kthye në vend

Bota

Trump uron Vuçiç në përvjetorin e shtetësisë, pret rritje të bashkëpunimit me Serbinë

Politiko 11 Shkurt 2025, 14:21

Trump uron Vuçiç në përvjetorin e shtetësisë,

Presidenti amerikan, Donald Trump e ka uruar presidentin e Serbisë, Aleksandar Vuçiç për ditën e shtetësisë së Serbisë – që shënohet më 15 shkurt – dhe ka thënë që pret se dy vendet do të forcojnë partneritetin dhe sigurinë për njerëzit e të dyja shteteve. Vuçiç e ka publikuar letrën e dërguar nga Trumpi, në një postim në llogaritë e tij në rrjetet sociale.

"Vlerësojmë jashtëzakonisht shumë kontributin e rëndësishëm të Serbisë në sigurinë ndërkombëtare, qoftë në mbështetjen për popullin e Ukrainës në mbrojtje nga agresioni rus, apo në kontributin e Serbisë në misione të shumta paqeruajtëse anembanë botës", është thënë mes tjerash në letrën e Trumpit për Vuçiçin.

Serbia, deri më tani, pavarësisht të gjitha thirrjeve të vendeve perëndimore, nuk ka vendosur sanksione ndaj Rusisë për luftën e nisur në Ukrainë, edhe pse me votimin për rezolutat në Kombet e Bashkuara (OKB) e ka konfirmuar se e dënon pushtimin.

Trump ka shtuar se Shtetet e Bashkuara mbështesin plotësisht vazhdimin e integrimeve të Serbisë në rrugën euroatlantike, si dhe përpjekjet e saj për promovimin e marrëdhënieve paqësore dhe të begata me fqinjët dhe partnerët në rajon.

"Mezi pres të forcojmë më tej partneritetin tonë, duke u mbështetur në lidhjet gjithnjë e më të fuqishme mes vendeve tona, për të kontribuar së bashku në rritjen e sigurisë dhe përparimit të qytetarëve të Serbisë dhe SHBA-së", është thënë mes tjerash në urimin e Trumpit.

Presidenti amerikan, ka theksuar, gjithashtu, se është i kënaqur me "bashkëpunimin gjithnjë e më intensiv dhe mundësitë e reja" për investime të ndërsjella në sektorë të rëndësishëm si teknologjia dhe energjia.

Së voni, Shtetet e Bashkuara e kanë vendosur Industrinë e Naftës së Serbisë (NIS) në listën e sanksioneve, për shkak se një pjesë e saj zotërohet nga kompania ruse, Gazprom Neft, me qëllim të parandalimit të Rusisë që të përdorë të ardhurat nga sektori energjetik për luftën në Ukrainë.

Vuçiq ka qenë njëri prej liderëve botërorë që kanë zhvilluar bisedë telefonike me Trumpin, disa ditë pas fitores së tij në zgjedhjet presidenciale të 5 nëntorit.

Atëbotë, presidenti serb pati thënë se ndihet “mirënjohës” ndaj Trumpit, që ai "menjëherë dinte shumë gjëra për Serbinë”.

Serbia, po ashtu, ka nënshkruar një kontratë me firmën e dhëndrit të Trumpit, Jared Kushnerit, në maj të vitit 2024 për “rivitalizimin” e kompleksit të Shtabit të Përgjithshëm në qendër të Beogradit, i cili është shkatërruar pjesërisht gjatë bombardimeve të NATO-s në vitin 1999./REL