Varianti i ri i Covid-19, shumë shtete po mbyllin kufijtë me Afrikën e Jugut

Shqetësimet për një variant të ri COVID-19 të zbuluar në Afrikën e Jugut kanë nxitur kufizime të reja të udhëtimit.

Komisioni Evropian ka rekomanduar pezullimin e udhëtimit ajror nga Afrika Jugore dhe "vendet e tjera të prekura" mes shqetësimeve për variantin.

"Të gjitha udhëtimet ajrore në këto vende duhet të pezullohen. Ato duhet të pezullohen derisa të kemi një kuptim të qartë për rrezikun që paraqet ky variant i ri dhe udhëtarët që kthehen nga ky rajon duhet të respektojnë rregullat strikte të karantinës," tha presidentja e Komisionit Ursula von der Leyen.

Gjermania, Italia dhe Franca kanë njoftuar tashmë masa për të kufizuar udhëtimin ajror nga rajoni.

Roma ka ndaluar hyrjen në territorin e saj për këdo që ka qëndruar në Afrikën Jugore "gjatë 14 ditëve të fundit", tha ministri i shëndetësisë Roberto Speranza, duke bërë thirrje për "masat paraprake maksimale" përballë variantit të ri.

Vendet e synuara nga kjo masë janë Afrika e Jugut, Lesoto, Botsvana, Zimbabve, Mozambiku, Namibia dhe Esëatini, tha ministri.

Ministri gjerman i Shëndetësisë, Jens Spahn tha të premten, se linjat ajrore që vijnë nga Afrika e Jugut do të mund të transportojnë vetëm shtetas gjermanë.

Udhëtarët do të duhet të kalojnë në karantinë për 14 ditë pavarësisht nëse janë të vaksinuar apo jo.

Qeveria franceze gjithashtu njoftoi të premten se po pezullonte mbërritjet nga Afrika Jugore. Holanda po planifikon masa të ngjashme, shkruan Euronews.

Londra tha se po ndalonte fluturimet nga Afrika e Jugut dhe pesë vende të tjera të Afrikës së Jugut dhe se kujtdo që kishte mbërritur së fundmi nga ato vende do t'i kërkohet të bënte një test të koronavirusit.

Shkencëtarët thonë se varianti është shqetësues për shkak të numrit të lartë të mutacioneve dhe përhapjes së shpejtë mes të rinjve në Gauteng, provincën më të populluar të Afrikës së Jugut.

I identifikuar aktualisht si B.1.1.529, varianti i ri është gjetur gjithashtu në Botsvanë, Hong Kong dhe Izrael tek udhëtarët nga Afrika Jugore.