Vëmendja e përqëndruar te lufta në Ukrainë, por sulmet nisin sërish në Rripin e Gazës

Avionët luftarakë izraelitë nisën një sulm në Rripin e Gazës, duke synuar atë që ushtria tha se ishte një vend për prodhimin e armëve që i përkiste Hamasit, grupit palestinez që administron enklavën bregdetare.

Ministria palestineze e Shëndetësisë nuk raportoi për viktima apo të lënduar. Hamasi tha se ata u kundërpërgjigjën me raketa tokë-ajër.

“Mbrojtja jonë ajrore iu përgjigj avionëve luftarakë sionistë në qiellin e Rripit të Gazës me raketa tokë-ajër saktësisht në orën 01:35 me orën lokale”, thuhet në një deklaratë.

Dje ndodhi sulmi i parë mes tensioneve në rritje mbi Xhaminë Al-Aksa në Jerusalemin Lindor të pushtuar.

Hamasi kishte paralajmëruar se çdo incident në kompleksin e Xhamisë Al-Aksa do të ishte një "vijë e kuqe" pasi forcat izraelite bastisën vendin në Jerusalemin Lindor të pushtuar disa herë në ditët e fundit, duke arrestuar qindra palestinezë dhe duke lënë dhjetëra të plagosur.

Palestinezët akuzojnë Izraelin për shkeljen e Al-Aksës gjatë muajit të shenjtë mysliman të Ramazanit. Izraeli thotë se protestuesit palestinezë kërkojnë të ndërpresin lutjet myslimane për qëllime politike dhe për të parandaluar vizitat e hebrenjve, të cilët po festojnë Pashkën.

Vendi është i nderuar nga muslimanët dhe hebrenjtë. Policia izraelite ka thënë se ishte e angazhuar për të siguruar që anëtarët e të gjitha besimeve të mund të festonin festat në mënyrë të sigurt.

Përpara sulmit me raketa, kryeministri izraelit Naftali Bennett akuzoi Hamasin se po zhvillon një "fushatë të egër ngacmimi" kundër Izraelit.

Egjipti dhe Jordania, të cilët nënshkruan marrëveshje paqeje me Izraelin dekada më parë dhe koordinohen me të për çështjet e sigurisë, kanë dënuar veprimet e forcave izraelite në vend.

Jordania, e cila shërben si kujdestar i zones, thirri zëvendës të ngarkuarin me punë të Izraelit në Aman të hënën në shenjë proteste.

Mbreti Abdullah II i Jordanisë tha se lëvizjet "të njëanshme" të Izraelit kundër besimtarëve myslimanë në xhaminë Al-Aksa minuan seriozisht perspektivat për paqen në rajon, sipas mediave shtetërore.

Izraeli ka kërkuar të përmirësojë marrëdhëniet me Jordaninë gjatë vitit të kaluar dhe kohët e fundit ka normalizuar marrëdhëniet me shtetet e tjera arabe për shqetësimet e tyre të përbashkëta për Iranin.

Burimi: AL Jazzera