Vijon bombardimi i qyteteve, rritet numri i civilëve të vrarë. Moska kërcënon me ndërprerje të furnizimit me gaz në Europë

Viktimat civile kanë vazhduar të rriten pasi forcat ushtarake ruse bombarduan qytete të ndryshme në Ukrainë gjatë natës dhe orëve të para të mëngjesit, sipas Shërbimit Shtetëror të Emergjencave të Ukrainës (SES).

Në Zhyotymyr, në perëndim të Kievit, u hap zjarr në një depo nafte. Në qytetin lindor të Sumy, bombardimet ajrore shkatërruan shtëpi banimi dhe i vunë flakën një ndërtese apartamentesh. Një grua u raportua e plagosur dhe nëntë persona u vranë, duke përfshirë dy fëmijë.

Në Mykolaiv në jug të Ukrainës, kanë shpërthyer disa zjarre në zona të banuara. Katër civilë u vranë në sulm dhe pesë të tjerë u shpëtuan nga rrënojat përpara se të dërgoheshin me urgjencë në spital

Në Kharkiv në Ukrainën lindore, bombardimet ruse i vunë zjarrin një ndërtese prej nëntë katesh dhe 27 njësive apartamentesh. Të paktën katër persona humbën jetën.

Të hënën, Rusia paralajmëroi se mund të mbyllë tubacionin e saj kryesor të gazit në Gjermani nëse Perëndimi vazhdon dhe ndalon naftën ruse.

Zëvendëskryeministri Alexander Novak tha se një veprim i tillë do të çonte në "pasoja katastrofike" për furnizimin global dhe do të çonte në dyfishimin e çmimit të naftës në 300 dollarë për fuçi.

SHBA-ja ka eksploruar një ndalim të mundshëm me aleatët si një mënyrë për të ndëshkuar Rusinë për pushtimin e saj në Ukrainë. Por Gjermania dhe Holanda e hodhën poshtë planin të hënën.

BE-ja merr rreth 40% të gazit dhe 30% të naftës së saj nga Rusia dhe nuk ka zëvendësues të lehtë nëse furnizimet ndërpriten.

Novok tha se Rusia ka çdo të drejtë të hakmerret dhe vuri në dukje vendimin e Gjermanisë muajin e kaluar për të bllokuar certifikimin për gazsjellësin e dytë Nord Stream midis dy vendeve.

Ushtria ukrainase pohoi gjithashtu se Rusia tani po i drejtohej luftës psikologjike, duke thënë se grupet e forcave ruse u krijuan për të "kryer punë propagandistike" në territoret e pushtuara për të ndikuar në banorët vendas.

Shefi humanitar i OKB-së, Martin Griffiths i bëri thirrje Ukrainës dhe Rusisë që të sigurojnë kalim të sigurt për civilët që ikin nga luftimet dhe për dërgimin e ndihmave humanitare në zonat e armiqësive aktive.

Burimi: BBC