VOA: Rusia pret lëvizjen e radhës të Trump pas përplasjes me Presidentin ukrainas

Rusët po përcjellin me vëmendje përpjekjet e Presidentit të Shteteve të Bashkuara Donald Trump për t’i dhënë fund luftës në Ukrainë, pas takimit të tensionuar të javës së kaluar me Presidentin e Ukrainës, Volodymyr Zelensky. Korrespondetët e Zërit të Amerikës nga Moska sjellin më shumë hollësi në kronikën në vazhdim.

Pas përplasjeve përgjatë viteve me Uashingtonin për përkrahjen ushtarake amerikane Kievit, shumë banorë në Moskë i shikojnë me entuziazmin të papërmbajtur përçarjet ndërmjet Shteteve të Bashkuara dhe Ukrainës, që dolën në pah javën e kaluar gjatë përplasjes së nxehtë në Zyrën Ovale mes Presidentit Trump dhe zotit Zelensky.

Mediat ruse e quajtën takimin në Uashington “një katastrofë” dhe “poshtërim” për presidentin ukrainas.

Kremlini thotë se është i gatshëm për paqe dhe akuzoi Ukrainën dhe shtetet evropiane se po punojnë për ta zgjatur luftën.

Ministri i Jashtëm rus Sergey Lavrov kritikoi ashpër propozimin për të dërguar paqeruajtës evropianë në territorin ukrainas.

“Presidenti Trump i kupton të gjitha. Ai tha se është ende herët të flitet për një zgjidhje. Mund të flasësh për këtë çështje, por për këtë gjë të duhet pajtimi i palëve. Ai po sillet me korrektësi. Ndërkohë që shtetet e BE-së, sikurse edhe plani i tyre për paqeruajtës në Ukrainë, janë vazhdimësi e nxitjes së regjimit në Kiev për të luftuar kundër nesh”, deklaroi zoti Lavrov.

Disa e konsiderojnë paqen e propozuar nga Kremlini si fitore të Rusisë dhe kapitullim të Ukrainës.

“Moska dëshiron paqe sipas kushteve të Moskës. Nga këndvështrimi im, është paqe që i lejon Moskës të përmbushë synimet e saj, ta kontrollojë Ukrainën. Prandaj, ky është versioni rus i paqes që kam frikë se nuk mund të përputhet me një Ukrainë që dëshiron pavarësi dhe Evropën që mendon se shtetet duhet të jenë të lira të zgjedhin fatin e tyre”, thotë Jacob Kaarsbo, ekspert ndërkombtëar i mbrojtjes.

Të tjerët dyshojnë që Presidenti rus Vladimir Putin dëshiron me të vërtetë që të arrijë paqen.

“Putini nuk ka dhënë shenja se është i interesuar t’i jap fund luftës. Ndërkohë që forcat ruse po përparojnë në pjesën lindore të Ukrainës, Putini mbase ndihet se është në pozitë më të mirë që të vazhdojë një luftë të gjatë shkatërruese, se sa Ukraina”, thotë analisti Lucas Robinson nga Instituti për Çështje Globale, me seli në Nju Jork.

Banorët e Moskës, që pranuan të flasin me Zërin e Amerikës, thotë se janë të gatshëm ta vazhdojnë luftën nëse Zelensky nuk zgjedh diplomacinë.

“Po të fillojnë negociatat, synimi i tyre duhet të jetë përcaktimi i fitores së Rusisë, duke marrë parasysh realitetin në terren, pasi ne po fitojmë”, tha Andrey, një banor i Moskës.

“Sipas mendimit tim, rrugëdalja tani është që ushtria jonë të përparojë”, thotë Artiom, banor i Moskës.

Presidenti Putin nuk ka bërë komente në lidhje me shkëmbimin e tensionuar ndërmjet Presidentit Trump dhe zotit Zelensky.

Kremlini po pret që Presidenti Trump të bëjë hapin e tij të radhës pas fjalimit që mbajti në Kongresin amerikan të martën, ku udhëheqësi amerikan citoi një letër nga Zelensky, ku presidenti ukrainas theksonte se ishte i gatshëm të negocionte menjëherë për arritjen e paqes./VOA