Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Danimarka lehtëson Shqipërinë dhe njofton se nuk do vendosë veton: Për hapjen e negociatave, mbështetemi te Komisioni Europian

Politiko 31 Janar 2018, 16:04

Nëse Komisioni Europian do të rekomandojë hapjen e negociatave me Shqipërinë, atëherë Danimarka nuk do të vendosë veton, por do të votojë pro vendit tonë. Ky vendim i është bërë i ditur ministrit të Jashtëm të Shqipërisë, Ditmir Bushati, gjatë takimit që zhvilloi në Kopenhagen me homologun Anders Samuelsen.

“Ministri Samuelsen, duke konfirmuar mbështetjen e Danimarkës për perspektivën evropiane të Ballkanit Perëndimor dhe duke vlerësuar punën e bërë, u shpreh se Komisioni Evropian është institucioni më i mirë për të vlerësuar progresin dhe se Danimarka do të mbështesë rekomandimin e Komisionit Evropian në raportin e tij për Shqipërinë në muajin prill”, thuhet në njoftimin e Ministrisë së Jashtme të Shqipërisë.

Danimarka është ndër ato shtete që ka mbajtur qëndrim skeptik ndaj Shqipërisë. Politiko.al raportoi ditën e djeshme se janë gjashtë shtete, Danimarka midis tyre, që kanë shprehur rezerva për ecurinë e Tiranës dhe se ekziston potenciali që të vendosin veton për hapjen e negociatave. Në vitin 2010-të, Kopenhageni vendosi veton për dhënien e statusit kandidat Shqipërisë, ndonëse Komisioni e kishte rekomanduar.

Ky qëndrim i mbajtur sot nga ministri danez, e rreshton vendin e Europës Veriore në listën e 12 shteteve të tjera që kanë deklaruar deri më tani votën pro Shqipërisë.

Tashmë, diplomacisë shqiptare i mbetet të punojë me pesë shtetet e tjera skeptike, Gjermaninë, Francën, Spanjën, Belgjikën dhe Holandën, për t’i bindur të mos vendosin veton nëse komisioni propozon hapjen e negociatave.

Hapja e negociatave, 12 shtete kanë deklaruar votën pro Shqipërisë, rreziku i vetos vjen nga 6 ‘të fuqishmit’ e BE

Njoftimi i MPJ-së shqiptare:

Ministri për Evropën dhe Punët e Jashtme Ditmir Bushati ndodhet në Danimarkë në një vizitë zyrtare, gjatë së cilës zhvilloi një takim me Ministrin e Punëve të Jashtme të Mbretërisë së Danimarkës z. Anders Samuelsen.

Ministrat Bushati dhe Samuelsen diskutuan mbi procesin e integrimit evropian, dinamikën e marrëdhënieve dypalëshe, bashkëpunimin rajonal dhe çështje të sigurisë evropiane e më gjerë.

Ministri Bushati i shprehu mirënjohjen kolegut Samuelsen për mbështetjen ndër vite të Danimarkës për proceset transformuese demokratike në vendin tonë dhe në procesin e integrimit evropian.

Duke u ndalur tek integrimi evropian, ministrat ndanë mendimin për impaktin transformues që ka politika e zgjerimit në vendet e rajonit të Ballkanit. Ministri Bushati e njohu kolegun e tij me procesin e reformave ne Shqipëri, me fokus reformën në drejtësi dhe progresin e bërë në plotësimin e pesë prioriteteve.

Ministri Samuelsen, duke konfirmuar mbështetjen e Danimarkës për perspektivën evropiane të Ballkanit Perëndimor dhe duke vlerësuar punën e bërë, u shpreh se Komisioni Evropian është institucioni më i mirë për të vlerësuar progresin dhe se Danimarka do të mbështesë rekomandimin e Komisionit Evropian në raportin e tij për Shqipërinë në muajin prill. Ministri Samuelson shprehu vlerësim për bashkëngjitjen e plotë të Shqipërisë me vendimet e BE-së në politikën e jashtme dhe të sigurisë.

Ministrat diskutuan mbi situatën në rajon. Ministri Samuelsen vlerësoi rolin konstruktiv të Shqipërisë në rajonin e Ballkanit Perëndimor, si faktor i qëndrueshëm stabiliteti dhe bashkëpunimi rajonal. Në këtë kontekst, ministrat nënvizuan rëndësinë e forcimit të perspektivës evropiane të rajonit të Ballkanit, përmes një vizioni të qartë dhe gjithpërfshirës në Strategjinë e Zgjerimit që pritet të miratohet së shpejti.

Gjatë takimit, ministrat shkëmbyen mendime per çështjet e sigurisë globale me të cilat po përballet Evropa dhe bota. Ministrat Bushati dhe Samuelsen vlerësuan bashkëpunimin dhe rolin e vendeve te tyre, edhe si vende anëtare të NATO-s, në luftën kundër terrorizmit dhe ekstremizmit të dhunshëm, IS, dhe rolin e aktorëve të tretë në krizat rajonale.

Ministri për Evropën dhe Punët e Jashtme zhvilloi dhe një takim me Nën-Sekretarin e Përhershëm në Kryeministri, z. Michael Starbæk Christensen, gjatë të cilit u diskutuan çështje të bashkëpunimit dypalësh dhe integrimit evropian.

Ministri Bushati zhvilloi gjithashtu një takim me përfaqësues të Komitetit për Çështjet Evropiane dhe të Politikës së Jashtme në Parlamentin e Danimarkës. Gjatë takimit u shkëmbyen mendime në lidhje me perspektiven evropiane të Shqipërisë.