Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Deputeti kundër Krimeve të Rënda: Dorëzoni trupin e Kostandino Kaçifas, po privoni prindërit ta qajnë sipas zakonit

Politiko 3 Nëntor 2018, 13:24

Deputeti kundër Krimeve të Rënda: Dorëzoni trupin e

Deputeti i LSI, Vangjel Tavo në qarkun e Gjirokastrës ka dalë sërish krah familjes së Kostandinos Kaçifa, i cili u vra të dielën e shkuar nga forcat RENEA në Bulart të Gjirokastrës, pas një shkëmbimi me armë zjarri.

Mësohet se prindërit e Kostandinos Kaçifa u kanë kërkuar autoriteteve shqiptare gjatë këtyre ditëve tërheqjen e trupit të tij për të kryer ritet e ceremonisë mortore.

Nga ana tjetër, Krimet e Rënda e kanë refuzuar kërkesën e tyre me argumentin 'deri sa të përfundojë ekspertiza mjeko-ligjore'.

Tavo në një reagim në rrjetet sociale i bën thirrje prokurorisë që të dorëzojë trupin te familjarët e tij dhe të varroset siç e do zakoni, ndërsa organet të vijojnë punën me hetimet.

Statusi i plotë:

Prej shumë ditësh debate të ashpra e të nxehta kanë vërshuar nga të dy anët e kufirit mbi ngjarjen e vrasjes në Bularat. Nacionalistë dhe anti-nacionalistë e kanë shfrytëzuar këtë ngjarje për të shprehur mllefet e tyre, të qëna e të paqëna, të kuptueshme e të pakuptueshme, herë të justifikueshme e herë tërësisht të paarsyeshme, duke drejtuar gishtin e duke u munduar të gjejnë fajtorin si brenda ashtu edhe jashtë kufirit.

Askush nuk ka justifikim as etnik e as ideologjik të kundërshtojë ligjet dhe organet ligj-zbatuese të një shteti, dhe asnjë një vend nuk duhet të lejojë e mbështesë radikalizmin, por çdo qytetar i thjeshtë e mbi të gjitha vetë shteti duhet të mbështesë e zbatojë të drejtën dhe ligjin.

Të gjithë ne duhet të jemi me ligjin, drejtësinë, kombin, flamurin, dhe vëllazërinë e bashkëatdhetarëve tanë, sepse kemi diçka të madhe që na bashkon: kjo është jeta. Qeniet njerëzore kanë një ADN, një gjak, një jetë, dhe pavarësisht se kujt kufiri i përkasin në botë, kanë një vlerë. Një njeri nuk jeton më. Konstandinos Kacifas nuk jeton më. Familja e tij kërkon trupin që ta qajë e varrosë sipas traditës e zakoneve të veta. Prokuroria të vazhdojë me hetimet e saj, me zbardhjen e ngjarjes dhe gjetjen e së vërtetës. Por, trupi duhet t’i dorëzohet familjes.

Edhe në kohët e lashta, armiqtë ulnin armët për disa ditë që të varrosnin të vdekurit, që prindërit të varrosnin bijtë e tyre. Edhe në ditët e sotme, në vendet e përfshira në luftra makabër e tribale, dorëzojnë trupat e respektojnë varrosjen, traditat e zakonet.

Ndaj mos privoni prindërit e familjarët të derdhin lotë e të vajtojnë siç ua kërkon zakoni. Askush nuk duhet të derdhë lotë për ekstremizëm, askush nuk duhet të vajtojë për ideologji vrastare, askush nuk duhet të nderojë pishtar-mbajtësit e vdekjes, qofshin ata nga ky krah apo nga krahu tjetër i kufirit, duhet t’u themi JO çdo radikalizmi, por prindërit kanë të drejtën e Perëndisë dhe zemrës njerëzore të varrosin fëmijën e tyre, ashtu siç do meritonte çdo prind, shqiptar, grek, e nga çdo cep e kthinë e botës.

“Kush shpëton një jetë shpëton një botë të tërë,” ka thënë Shën Tereza jonë. Ne të gjithë nuk arritëm dot ta shpëtonim Konstandinos Kacifas, as nga ideologjitë e sjellja e tij e as nga vrasja e tij, por sot kemi mundësinë të shpëtojmë veten, të tregojmë që jemi ende njerëz, dhe që kemi ende zemër.