Adresat e banimit/ Konfirmimi bëhet në e-Albania ose në Gjendje Civile, në të kundërt nuk merr certifikatë

Adresat e banimit për çdo qytetar tashmë do të duhet të konfirmohen në portalin e-Albania ose në Gjendje Civile. Ministria e Brendshme ka ndërmarrë një fushatë për sistemimin e adresave të banesave për çdo shqiptar.

Ministri i Brendshëm Bledi Çuçi njoftoi se vetëm 750 mijë familje e kanë një adresë të saktë në Shqipëri. Rolin kryesor në këtë fushatë, ministri theksoi se e kanë zyrat e Gjendjes Civile dhe bashkitë.

“Sot 750 mijë familje e kanë një adresë të saktë në Republikën e Shqipërisë që ka 8 komponentë dhe i takon çdo shtetasi shqiptar një adresë unike, por jemi akoma larg. Të gjithë shqiptarët duhet ta kenë një adresë. Rol kryesor zyrat e gjendjes civile dhe bashkitë, përfshirja e vetë qytetarëve që duhet të ndërgjegjësohen dhe të marrin pjesë në verifikimin e adresave dhe të gjithë aktorët e tjerë për të pasur një adresë të evidentueshme dhe unike”, tha Çuçi.

Në rast se qytetarët, nuk konfirmojnë adresën e saktë të banimit, nuk do të marrin dot certifikatë. Ministri i Brendshëm paralajmëroi kushtëzim të procesit lidhur me dhënien e shërbimeve të tjera nga zyra e Gjendjes Cilve dhe Bashkitë.

“Nuk do ta marrë më certifikatë nëse ai nuk konfirmon adresën sipas sistemit unik. Kështu do ta shtrimë edhe për shërbime të tjera këtë detyrim. Ky proces i rëndësishëm i marrëdhënies me qytetin dhe shtetin të përfundojë. Pasi të jenë saktësuar adresa do të lidhet me regjistrin kombëtar të gjendjes civile. Siç jepen të gjitha të dhënat, te rubrika adresa do të përfshihet edhe adresa. Në certifikatë do të ketë adresën e saktë çdo shtetas shqiptar. Çdo shtetas shqiptare identifikohet sot lehtësisht me këtë adresë. Kështu që unë kërkoj në radhë të parë nga të gjithë ne, nga të gjithë ju që jeni këtu, nga kryetarët  bashkive një angazhim maksimal që të mbyllim këtë proces të rëndësishëm. Por edhe qytetarët ti kushtojnë vetëm dy minuta kohë për të vendosur një marrëdhënie korrekte, për të kryer një detyrim qytetar që të saktësojë adresën e tij atje ku banon. Shumë shpejt do ta kushtëzojmë këtë proces me dhënien e shërbimeve. Por nuk duam që të arrijmë në atë pikë sepse besojmë se shqiptarë e kanë atë koshiencë që ti kushtojnë dy minuta angazhimit të tyre për të vendosur një marrëdhënie sa më të saktë me shtetin e tyre,” u shpreh Çuçi.

Hapat për t’u regjistruar:

1. Hyr në e-Albania

2.  Identifikohu si qytetar

3. Kërko shërbimin aplikimin për ndryshim apo saktësim vendbanimi

4. Kiliko te “Lexo më shumë për të mësuar të gjitha hapat”

5. Kliko butonin përdor

6. Shko te krijoi aplikim të ri (kërkohet plotësimi i elementëve të adresës)

7. Nëse nuk e di adresën kliko te linku i regjistrit të adresave, të hapet harta për të bërë identifikimin automatikisht

8. Plotësoni fushat një nga një

9. Ngarkohet dokumenti që vërteton pronësinë

10. Kliko butonin apliko

11. Nga dy moment bëhet verifikimi dhe brenda 24 orëve ju vjen mesazhi te e-Albania

12. Mund të shkarkoni certifikatën për të verifikuar adresën