Flash News

Aksident te "Shkalla e Tujanit", kamioni përmbyset në mes të rrugës, plagoset shoferi

By pass-i i Vlorës, zvarritje punimesh dhe rritje kostosh

Milan pritet të heqë dorë nga transferimi i Granit Xhakës

Inceneratori jashtë funksionit, përfshihet nga flakët fusha e mbetjeve në Elbasan

Aksident në aksin Lezhë-Shëngjin, një i plagosur

Ditari i Maxhorancës

Grevistët e Ballshit nuk 'i binden', Rama-Hajdarit: ARMO nuk vidhet! Më ndihmo! Azem Hajdari s'u fut në grevë për të vdekur

Politiko 29 Tetor 2020, 15:24

Grevistët e Ballshit nuk 'i binden', Rama-Hajdarit: ARMO nuk

Kryeministri Edi Rama

Kryeministri Edi Rama ka reaguar ashpër pas deklaratës së deputetes Rudina Hajdari, e cila u shpreh se ‘nuk është e vërtetë që ARMO është me humbje dhe se nafta e saj vidhet dhe shitet në të zezë.’

Duke përsëritur thirrjen ndaj grave greviste për mbylljen e grevës dhe uljen për diskutime me qeverinë, Rama akuzoi Hajdarin për ‘mashtrim nga padituria’. Sipas kryeministrit nuk është e vërtetë që nafta e ARMO-s vidhet sepse “fabrika është e fikur, nuk përpunon asnjë gram lëndë djegëse.

Rama i kërkoi Hajdari, që të bashkohet me të në përpjekjen që gratë e Ballshit të dalin nga greva, ndërsa i kujton të atin. Sipas Ramës, ultimatumet nuk funksionojnë.

“Përfitoj nga rasti t’iu ftoj dhe ju z.Hajdari që të bashkoheni me mua, në përpjekjen që gratë atje të mbyllin grevën, se në të kundërt nuk do të ketë zgjidhje, nuk do të ndodhë. Kanë provuar edhe të tjerë më parë që këtë qeveri ta trembin me presione, por s’ja kanë dalë. Për çfarë u fut Azem Hajdari në grevë urie? Për t’u dëgjuar, jo për të vdekur. Ne jemi gati të ulemi, por me arsye, jo me ultimatume, se nuk funksionon”, tha kryeministri Rama.

Pjesë nga deklarata e Ramës në parlament:

Dua të sqaroj ata që flasin për vete kur iu referohen hallexhinjve të këtij vendi, se hallet e njerëzve nuk zgjidhen me padituri dhe nuk zgjidhen duke gënjyer. Unë nuk kam asnjë arsye të mendoj se z. Hajdari gënjen me vetëdije, por gënjen nga padituria. Ju thoni se nafta aty po vidhet, ndërkohë që fabrika është e fikur, nuk përpunon asnjë gram naftë. Ndërkohë që nga ana tjetër fabrika përpunon naftën që nxirret nga kompania, e cila eksploron fushën pranë. Kompania është private, e huaj, dhe për sa kohë fabrika është e fikur kompania e naftës e çon në treg. Tani si vidhet nafta dhe kush e vjedh, kur bëhet fjalë për një kompani private? E vërteta është se ata nuk marrin rrogat, pasi fabrika nuk punon. Kështu që duhet të përgatiteni, kur merrni përsipër të ndihmoni njerëz, se nga dëshira për të ndihmuar, por nga padija, mund të bëni më shumë dëm se mirë.

Është e pavërtetë ajo që thoni që unë hesht, bëj sikur s’dëgjoj. Ne dëgjojmë shumë mirë, por ka një problem. Punonjësit e një kompanie private, e cila falimenton, trajtohen nga shteti me asistencë sociale. Ky është detyrimi që ka shteti. Çështja është që ne e dimë shumë mirë që ata nuk janë aty, sepse duan asistencë sociale, por asistenca sociale implikon edhe largimin përfundimtar prej aty. Ata duan paga. Po nga kush i duan pagat, nga shteti? Si mund të jetë kështu, që ata i kërkojnë shtetit të mbart si trashëgimi problemin që krijon kompania private. Nuk jemi më në komunizëm, qysh kur babai juaj dhe ju vendosët ta rrëzoni komunizmin. Marrëdhëniet e punës dhe marrëdhëniet mes individit dhe shtetit kanë ndryshuar. Këtë gjë njerëzit, në grupe të caktuara, nuk duan ta kuptojnë.

Unë po ua përsëris çdo ditë që ato zonjat atje të ndalojnë grevën dhe unë menjëherë jam i gatshëm të shkoj atje dhe të qajmë hallet bashkërisht. Ata duhet ta mbyllin grevën, sepse kjo qeveri nuk bashkëbisedon nën presion. Nuk mund t’i lejojmë vetes, me gjithë dhimbjes dhe respektin ndaj atyre grave, që këtu të krijohet precedenti që je i pakënaqur me sipërmarrësin aty ku punon, futesh në grevë dhe merr ato që kërkon pa pranuar as arsyen e tjetrit. Tjetri në këtë rast është qeveria, që administron kontributet e të gjithë shqiptarëve. Kështu që përfitoj nga rasti t’iu ftoj dhe ju z.Hajdari që të bashkoheni me mua, në përpjekjen që gratë atje të mbyllin grevën, se në të kundërt nuk do të ketë zgjidhje, nuk do të ndodhë. Kanë provuar edhe të tjerë më parë që këtë qeveri ta trembin me presione, por s’ja kanë dalë. Për çfarë u fut Azem Hajdari në grevë urie? Për t’u dëgjuar, jo për të vdekur. Ne jemi gati të ulemi, por me arsye, jo me ultimatume, se nuk funksionon.