Balla: Si do veprojë Rama nëse Meta nuk i dekreton qeverinë pas 25 prillit  

Kreu i Grupit Parlamentar të Partisë Socialiste, Taulant Balla, iu përgjigj presidentit Ilir Meta, i cili një ditë më parë deklaroi me tone të ashpra se do të japë dorëheqjen më 26 prill, nëse PS fiton 71 mandate pa i vjedhur.

I ftuar në ‘Real Story’, Balla shprehet i bindur se PS fiton zgjedhjet dhe shton se Meta duhet ta mbajë fjalën dhe të dorëhiqet më 26 prill.

I pyetur se çfarë do të ndodhë nëse PS fiton zgjedhjet, por Presidenti Meta nuk i dekreton, Balla deklaroi se Rama do të vijojë të qeverisë me qeverinë aktuale, derisa Gjykata Kushtetuese ta zgjidhë çështjen.

“Presidenti ka zero kompetencë për të mos njohur rezultatin e zgjedhjeve. Nuk ka asnjë lloj kompetence.

Unë dua t’i them Ilir Metës publikisht që ta mbajë fjalën e dhënë para shqiptarëve dje se më 26 prill do të japë dorëheqjen, sepse jo vetëm që do të fitojmë në mënyrë të ndershme, por dua të them që Ilir Meta po imponohet për ta shndërruar 25 prillin në një referendum kush është pro dhe kush është kundër reformës në drejtësi, sepse bashkë me Lulzim Bashën, nëse lexoni marrëveshjen e tyre, kuptoni se këtu bëhet fjalë për një përpjekje për të zhbërë reformën në drejtësi.

Kuvendi mblidhet më 9 shtator, besoj se deri atëherë Ilir Meta do ta ketë mbajtur fjalën dhe do ketë dhënë dorëheqjen. Deri në konstituimin e Parlamentit të ri, Kuvendi merr kompetencat e Presidentit.

Derisa Gjykata Kushtetuese të zgjidhë këtë çështje, pra mungesën e dekretit të Presidentit për t’i dhënë të drejtë Ramës të prezantojë qeverinë e re, kryeministri Rama do të vazhdojë detyrën me qeverinë aktuale”, u shpreh Balla.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm