Harron korrupsionin e tij, Rama këshillon kryeministrin spanjoll: Mos u dorëzo para shpifësve dhe manipuluesve

Të mërkurën mbrëma, kryeministri socialist i Spanjës, Pedro Sánchez, njoftoi papritur se po anulonte detyrat e tij publike për pjesën tjetër të javës dhe po konsideronte dorëheqjen nga detyra. Ai tha se vendimin e tij do ta shpallë të hënën.

Njoftimi erdhi disa orë pasi një gjykatë e Madridit kishte hapur një hetim ndaj gruas së Sánchez, Begoña Gómez, për korrupsion.

Një mesazh ngushëllimi, Sanchez-it i ka ardhur nga kryeministri Edi Rama. Në një postim në platformën “X”, Rama i referohet akuzave ndaj gruas së Sanchez, me të njëjtën gjuhë sikurse i drejtohet drejtësisë në Shqipërisë, duke i quajtur “shpifës, gënjeshtarë e manipulues faktesh”.

Rama i ofron kryeministrit spanjoll mbështetjen e tij për të vijuar luftën me drejtësinë.

“Është privilegj të kem miqësinë tuaj dhe mundësinë për të punuar me ju në këto kohë të trazuara për vlerat dhe parimet në të cilat besojmë dhe luftojmë. Të kesh ty si udhëheqës të lëvizjes sonë socialiste do të thotë të udhëhiqemi në përpjekjet tona nga një njeri me mençuri dhe integritet të pamohueshëm. Ju keni të gjithë mbështetjen tonë në këto kohë ku më shumë se kurrë duhet qëndrueshmëri ndaj gënjeshtarëve, shpifësve dhe manipuluesve të fakteve nga skajet e sferës politike dhe instrumenteve të propagandës së tyre. Është nder të qëndroj pranë jush.

Arritja juaj e presidencës së qeverisë përmes zgjedhjeve të ndershme dhe legjitime, dhe falë politikës së ndershmërisë, solidaritetit dhe vullnetit të pamëshirshëm për dialog që keni dhënë për kombin tuaj, është një arsye bindëse për të vazhduar luftën. Për Spanjën, për Evropën dhe për të gjithë ne. Kurrë mos u dorëzo, kurrë mos u dorëzo, kurrë mos dysho se e vërteta do të mbizotërojë miku im i dashur”, shkruan Pedro.

Kjo mbështetje për kryeministrin spanjoll vjen në kohën kur Rama ka sulmuar hapur disa herë televizion Rai 3, për një investigimin që emisioni “Report” transmetoi për Shqipërinë.

Me të fshehtat e marrëveshjes për refugjatët, përfshirjen dhe etiketimin nga media italiane si “avokat i narkotrafikantëve” të Engjëll Agaçit dhe publikimin e dokumenteve ku provohet përfshirja e Olsi Ramës në dosjen ‘Xibraka’, Rama u detyrua të shpërthejë kundër televizionit italian, duke i akuzuar për shpifje e manipulim faktesh.

Në një raport të fundit të IMD dhe Transparency International, theksohej se në Shqipëri janë të pranishme forma të ndryshme korrupsioni, nga korrupsioni i vogël dhe nepotizmi deri te pastrimi i parave dhe kapja e shtetit, të cilat kanë marrë një rritje të konsiderueshme.

Pra, mbështetja ndaj Sanchez vjen nga një kryeministër të cilit faktet dhe të vërtetat e qeverisë së tij korruptive i janë vënë para jo vetëm nga opozita dhe mediat në Shqipëri, por edhe nga organizatat ndërkombëtare.