Investigimi/ Rama sulmon sërish Rai-n: Baltë e prodhuar për luftën politike ndaj meje

Dy ditë pas intervistës së tij për emisionin “Report” dhe publikimit të investigimit të radhës, kryeministri Edi Rama ka sulmuar sërish televizionin shtetëror italian RAI3.

Sulmi vjen pasi në episodin e fundit të “Report” dolën fakte se si ministra të Melonit zotëronin biznese në Shqipëri me mbështetje të Ramës dhe deklarata e bujshme e Ahmetajt.

Në një komunikim në Facebook, Rama e ka quajtur “baltë të prodhuar në Tiranë për luftë politike” investigimin e gazetarit italian Giorgio Mottola.

Kullat e larta që ngrihen dita-ditës në Tiranë nuk i bëjnë përshtypje Ramës, kur thotë se “5 kulla në Tiranë u duken si 500.”

Rama sulmon opozitën duke ia atribuuar asaj prodhimin e investigimit edhe pse qartazi fakte, dokumente dhe dëshmi tregonin se si Rama ka siguruar që një ministër italian të ketë bashkëpunim dhe lidhje të fortë me një ish-deputet socialist si Artan Gaçi, të cilit i është sekuestruar sipërfaqja e tokës së marrë nga prona shtetërore.

Rama: Baltë e prodhuar këtu në Tiranë, për luftën politike ndaj meje dhe qeverinë. Gjithë ajo baltë e eksportuar, e ekspozuar me lloj lloj emrash. Ishte një baltë e pamerituar mbi Shqipërinë. Shikoni, Shqipëria nuk është ajo që ka qenë, jemi çliruar nga hijet e së kaluarës. Prandaj 5 kulla në Tiranë u duken si 500. Me ndihmën e politikanëve pa fe, hodhën baltë për të na pikturuar si trafikantë, kriminel. Po ky cenim sidomos nga vendet fqinje, është një sulm mbi flamurin tonë, mbi dinjitetin tonë.

Ata e kishin me qeverinë e tyre dhe deri këtu janë në të drejtën e tyre të shenjtë. Por ama kur pastaj fusin në valle edhe qeverinë tonë, duke marrë autobote me llum nga kanalet e ujërave të zeza politike e mediatike këtu në Tiranë, për të thënë se marrëveshja e qeverisë së Italisë me qeverinë e Shqipërisë është jo vetëm e keqe, po edhe është bërë me një narkoshtet, me një qeveri ku shumë anëtarë të saj na qenkan të dënuar dhe të lidhur me mafian, ata shkelin, jo vetëm mbi të vërtetën, po edhe mbi nderin e mbi dinjitetin tonë shtetëror dhe kombëtar.

Bashkëpunimi me një grusht shqiptarësh që ju i njihni shumë mirë, s’kanë atdhe, s’kanë fe, s’kanë din e as iman, që jo nuk e bindin dot popullin këtu, megjithëse shajnë e shpifin ditë-natë prej vitesh të tëra, po vetëm humbasin e diskreditohen përditë në sytë e tij, RAI 3 dha dy shfaqje të neveritshme të një gjasme gazetarie investigative.

U përdorën si  heronj të këtyre shfaqjeve figura të errëta, një kriminel italian i dënuar 17 vjet nga drejtësia shqiptare për tërë të zezat, një i arratisur i shpallur në kërkim ndërkombëtar nga SPAK-u, një i mbyllur në arrest shtëpie nga gjykata speciale antikorrupsion, një i përjashtuar nga Vetingu në sistemin e drejtësisë. U mor edhe ndonjë  opinionist, veteran i luftës me gjysmë të vërteta kundër meje e qeverisë sonë qysh se s’mbahet mend e ku di unë kush tjetër, ndërkohë që u trajtuan si personazhe negativë të shfaqjes, deri tek personalitete të politikës e të kulturës italiane apo lloj-lloj individësh të njohur e të panjohur në Shqipëri, duke hedhur baltë akuzash e dyshimesh, pa asnjë lloj fakti.

Por në fund shfaqja që dukej si një çorbë tik-toku, qep, shqep e bashko fjalë e imazhe sipas skenarit, nuk tha asgjë të re përveç jashtënxjerrjeve të ujërave të zeza të politikës Non Grata e të kanaleve mediatike këtu në Shqipëri, që i shërbejnë asaj llum politike. Asgjë pakontestueshme logjikisht, nuk kishte aty e lëre pastaj të vlefshme juridikisht, nga ky pseudo investigim italo-shqiptar, po vetëm u mbars mali dhe polli një mi, duke u justifikuar në fund se prova s’ka po ka akuza”!

Akuza nga kush, mbi çfarë baze faktike, mbështetur mbi cilat të vërteta të provuara? Një shfaqje televizive si një version demokratik i hetimeve famëkëqija të Sigurimit të Shtetit, “ky tha, ai tha, ata thonë”, “ai takoi atë”, “ky u takua me atë”, “ti takove ata”, “thuhet se këtu bëhet kjo”, “thonë se në Shqipëri ndodhin këto”, “janë arrestuar, jo s’janë arrestuar”, “janë të lidhur, jo s’janë të lidhur”, “thanë dy kriminelë që njohin atë”, “ka akuza për vëllain e atij”, “ata atje pastrojnë paratë e atyre andej”, bla-bla-bla…

Por tekefundit, te paktën ana italiane e këtij bashkëprodhimi te neveritshëm, e pohoi me gojën e vet se nuk janë ata që mendojnë se Shqipëria është një narkoshtet, nuk janë ata drejtpërdrejtë që akuzojnë, po janë të tjerë, janë këtu, në mesin tonë, ndërsa ata thjesht gatuan një çorbë me prodhime bio shqiptare.